ភ្នំពេញ ៖ លោក ជា ចាន់តូ ទេសាភិបាលកិត្តិយស ធនាគារជាតិនៃកម្ពុជា និងជាតំណាងរាស្រ្ត មណ្ឌលខេត្តកំពង់ធំ បានទទួលមរណភាព នាវេលាម៉ោង ១០និង៣៥ នាទីព្រឹកថ្ងៃទី២៥ ខែតុលា ឆ្នាំ២០២៤ ក្នុងជន្មាយុ ៧៣ ឆ្នាំ ដោយរោគាពាធ ។ នេះយោងតាមសេចក្ដីជូន ដំណឹងមរណភាព របស់ធនាគារជាតិកម្ពុជា។
សេចក្តីជូនដំណឹងបន្តថា បច្ចុប្បន្នសពរបស់លោក ជា ចាន់តូ កំពុងតម្កល់ធ្វើបុណ្យតាមប្រពៃណីសាសនា នៅផ្ទះលេខ ១៣៥ ផ្លូវម៉ាស៊ីនទឹក សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
សូមបញ្ជាក់ថា លោក ជា ចាន់តូ បានកាន់តំណែងជាអគ្គទេសាភិបាល នៃធនាគារជាតិតាំងពីឆ្នាំ១៩៩៨ រហូតមកដល់ឆ្នាំចុងឆ្នាំ២០២៣។ ក្នុងដំណើរ នៃការដឹកនាំធនាគារជាតិនេះ លោកបានខិតខំប្រឹងប្រែង តស៊ូ និងលះបង់កម្លាំងកាយ កម្លាំងចិត្ត ពេលវេលាប្រាជ្ញាស្មារតី ក្នុងការដឹកនាំធនាគារជាតិ ប្រកបដោយគតិបណ្ឌិត និងចក្ខុវិស័យវែងឆ្ងាយ ព្រមទាំងអភិវឌ្ឍវិស័យធនាគារ និងហិរញ្ញវត្ថុនៅកម្ពុជា ឱ្យរីកចម្រើនប្រកបដោយចីរភាព ។
បច្ចុប្បន្នធនាគារជាតិ ត្រូវបានដឹកបន្តដោយលោកស្រី ជា សិរី ដែលត្រូវជាកូនស្រីបង្កើត របស់លោក៕
