បរទេស៖ លោកប្រធានាធិបតី Donald Trump បាននិយាយថា ទីភ្នាក់ងារសហរដ្ឋអាមេរិក សម្រាប់ការអភិវឌ្ឍន៍អន្តរជាតិ (USAID) ប្រឈមនឹងអំពើពុករលួយស្ទើរតែ មិនធ្លាប់មានពីមុនមក ហើយគួរតែត្រូវបិទចោល។
យោងតាមសារព័ត៌មាន RT ចេញផ្សាយនៅថ្ងៃទី៨ ខែកុម្ភៈ ឆ្នាំ២០២៥ បានឱ្យដឹងថា នៅក្នុងបទបញ្ជាប្រតិបត្តិដំបូងមួយ បន្ទាប់ពីលោកចូលកាន់តំណែង លោក Trump បានផ្អាកជំនួយបរទេសទាំងអស់ របស់សហរដ្ឋអាមេរិក ដោយរង់ចាំការត្រួតពិនិត្យរយៈពេល ៣ ខែ ចំពេលមានការជំរុញឱ្យកាន់តែទូលំទូលាយ ដើម្បីកាត់បន្ថយការចំណាយរបស់រដ្ឋាភិបាល។
រដ្ឋមន្ត្រីការបរទេសអាមេរិក លោក Marco Rubio ក្រោយមកបានបញ្ឈប់គម្រោង មួយចំនួនដែលផ្តល់ឲ្យទីភ្នាក់ងារ USAID ដែលជាទីភ្នាក់ងារសំខាន់របស់ទីក្រុងវ៉ាស៊ីនតោន សម្រាប់គ្រប់គ្រងការផ្តល់មូលនិធិ ដល់គម្រោងនយោបាយនៅបរទេស។
លោក Elon Musk ដែលដឹកនាំក្រសួងប្រសិទ្ធភាពរដ្ឋាភិបាលថ្មី (DOGE) ដែលកំពុងវាយតម្លៃការចំណាយ របស់ទីភ្នាក់ងារសហព័ន្ធ បានដាក់ស្លាក ឬ ហៅ USAID ថា ជា “អង្គការឧក្រិដ្ឋកម្ម”។
លោក Trump បានសរសេរនៅលើបណ្តាញទំនាក់ទំនងសង្គម Truth Social កាលពីថ្ងៃសុក្រថា “USAID កំពុងជំរុញឱ្យពួករ៉ាឌីកាល់ឆ្កួត ហើយគ្មានអ្វីដែលពួកគេអាចធ្វើអំពីវាបានទេ ពីព្រោះវិធីដែលលុយត្រូវបានចំណាយច្រើន ដោយការក្លែងបន្លំគឺមិនអាចពន្យល់បានទាំងស្រុង” ។
លោកបន្តថា «អំពើពុករលួយគឺមានកម្រិត កម្រឃើញពីមុនមក។ បិទវាចុះ!” ។
លោក Trump បានសរសេរនៅលើ Truth Social កាលពីថ្ងៃព្រហស្បតិ៍ថា ទីភ្នាក់ងារ USAID បានលួចលុយរាប់ពាន់លានដុល្លារ “ភាគច្រើនវាទៅប្រព័ន្ធផ្សព្វផ្សាយព័ត៌មានក្លែងក្លាយជា “ប្រាក់ទូទាត់សរុប” សម្រាប់ការបង្កើតរឿងល្អៗអំពីអ្នកប្រជាធិបតេយ្យ។ នយោបាយឆ្វេងនិយម ដែលគេស្គាល់ថាជា “Politico” សារព័ត៌មាន Politico ហាក់ដូចជាបានទទួលលុយ ៨លានដុល្លារ ៕
ប្រែសម្រួលៈ ណៃ តុលា
