បរទេស៖ ក្រុមហ៊ុនផលិតរថយន្តអគ្គីសនី (EV) របស់ចិន Xiaomi បាននិយាយថា ខ្លួននឹងសហការជាមួយនឹងការស៊ើបអង្កេតរបស់ប៉ូលីស លើការបុកដ៏ធ្ងន់ធ្ងរមួយ ដែលពាក់ព័ន្ធនឹងរថយន្តរបស់ខ្លួន ដែលស្ថិតក្នុងរបៀប ឬ Mode ស្វ័យប្រវត្តិ នៅមុនពេលគ្រោះថ្នាក់។
យោងតាមសារព័ត៌មាន VN Express ចេញផ្សាយនៅថ្ងៃទី២ ខែមេសា ឆ្នាំ២០២៥ បានឱ្យដឹងថា និស្សិតមហាវិទ្យាល័យចំនួន ៣នាក់បានស្លាប់ កាលពីយប់ថ្ងៃសៅរ៍បន្ទាប់ពីរថយន្តម៉ាក Xiaomi SU7 របស់ពួកគេបានបុករបាំងបេតុង នៅលើផ្នែកមួយនៃផ្លូវល្បឿនលឿន Dezhou-Shangrao Expressway ភាគខាងកើត ខេត្ត Anhui ប្រទេសចិន។
មុនពេលកើតហេតុ រថយន្តនេះស្ថិតនៅក្នុងមុខងារ បើកបរដោយខ្លួនឯង (Navigate On Autopilot) របស់ក្រុមហ៊ុន Xiaomi ដែលកំពុងបើកបរក្នុងល្បឿន ១១៦ គីឡូម៉ែត្រក្នុងមួយម៉ោង, នេះបើយោងតាមសេចក្តីថ្លែងការណ៍ របស់ក្រុមហ៊ុនដែលបានបង្ហោះលើអ៊ីនធឺណិត។
Xiaomi បាននិយាយថា ខណៈពេលដែលកំពុងធ្វើដំណើរ លើកំណាត់ផ្លូវហាយវេ រថយន្តបានរកឃើញឧបសគ្គនៅខាងមុខ ចេញការព្រមាន និងប្រគល់ការគ្រប់គ្រងទៅអ្នកបើកបរវិញ។ ប៉ុន្តែប៉ុន្មានវិនាទីក្រោយមក រថយន្តបានបុករបាំងថ្មក្នុងល្បឿន ៩៧ គីឡូម៉ែត្រក្នុងមួយម៉ោង។
ស្ថាបនិកក្រុមហ៊ុន Xiaomi លោក Lei Jun បាននិយាយនៅក្នុងការបង្ហោះប្រព័ន្ធផ្សព្វផ្សាយ សង្គមកាលពីល្ងាចថ្ងៃអង្គារថាលោក “មានអារម្មណ៍ក្រៀមក្រំ” ហើយថាក្រុមហ៊ុនរបស់លោកនឹង “បន្តសហការជាមួយនឹងការស៊ើបអង្កេតរបស់ប៉ូលីស” ។
ចាប់តាំងពីមានឧប្បត្តិហេតុបុកនេះមក បណ្តាញអ៊ីនធឺណេតជាច្រើនបានចោទសួរ អំពីមុខងារជំនួយការបើកបររបស់រថយន្ត Xiaomi ថាហេតុអ្វីបានជារថយន្តបានឆេះ ហើយថាតើទ្វារអាចត្រូវបាន បើកនៅពេលមានអាសន្ន ៕
ប្រែសម្រួលៈ ណៃ តុលា
