ចិន ជំរុញហ្វីលីពីនឲ្យបញ្ឈប់ការបញ្ជូនសញ្ញាខុសណាមួយទៅកាន់កងកម្លាំងផ្តាច់ខ្លួនតៃវ៉ាន់
ប្រែសម្រួល ឈូក បូរ៉ា
ប៉េកាំង៖ អ្នកនាំពាក្យក្រសួងការបរទេសចិនបានឲ្យដឹងថា ប្រទេសចិន បានជំរុញប្រទេសហ្វីលីពីនឱ្យឈប់លេងជាមួយភ្លើង លើបញ្ហាទាក់ទងនឹងផលប្រយោជន៍ស្នូលរបស់ប្រទេសចិន និងបញ្ឈប់ការបញ្ជូនសញ្ញាខុសណាមួយទៅកាន់កងកម្លាំងបំបែកខ្លួន “ឯករាជ្យតៃវ៉ាន់”។
អ្នកនាំពាក្យបានធ្វើការកត់សម្គាល់នៅពេលត្រូវបានស្នើសុំឱ្យធ្វើអត្ថាធិប្បាយលើប្រទេសហ្វីលីពីនដែលអនុញ្ញាតឱ្យមានដំណើរទស្សនកិច្ចដោយប្រធាននាយកដ្ឋានកិច្ចការបរទេសនៃអាជ្ញាធរតៃវ៉ាន់។
មានសេចក្តីរាយការណ៍ថា ប្រធាននាយកដ្ឋានកិច្ចការបរទេសនៃតំបន់តៃវ៉ាន់នាពេលថ្មីៗនេះបានទៅបំពេញទស្សនកិច្ចនៅប្រទេសហ្វីលីពីនក្នុងនាមជាប្រធានមូលនិធិមួយ ហើយលោកបានជួបជាមួយមន្ត្រីហ្វីលីពីនមួយចំនួន និងចូលរួមសកម្មភាពសេដ្ឋកិច្ច និងពាណិជ្ជកម្ម។
អ្នកនាំពាក្យបានបន្ដថា ហ្វីលីពីន ដោយអនុញ្ញាតឱ្យលោក Lin Chia-lung ធ្វើទស្សនកិច្ចនៅប្រទេសនេះ ក្នុងនាមជាប្រមុខនៃមូលនិធិមួយ បានផ្តល់វេទិកាមួយ សម្រាប់ក្រុមផ្តាច់ខ្លួន “ឯករាជ្យតៃវ៉ាន់” ដើម្បីចូលរួមក្នុងសកម្មភាពប្រឆាំងចិន ហើយបានរំលោភយ៉ាងធ្ងន់ធ្ងរលើបទដ្ឋានជាមូលដ្ឋានក្នុងទំនាក់ទំនងអន្តរជាតិ និងការប្តេជ្ញាចិត្តផ្ទាល់របស់ហ្វីលីពីន លើបញ្ហាដែលទាក់ទងនឹងកោះតៃវ៉ាន់៕
