អភិបាលខេត្តពោធិ៍សាត់ ដឹកនាំចលនាបងប្អូនសហគមន៍ ប្រជាការពារ និង អាជ្ញាធរមូលដ្ឋាន ដាំដើមឈើ ដើម្បីស្តារឡើងវិញ ជាតំបន់បៃតង នៅលើកូនភ្នំ ក្នុងឃុំប្រម៉ោយ ស្រុកវាលវែង
ពោធិ៍សាត់÷នៅរសៀលថ្ងៃអាទិត្យទី ១៩ ខែ តុលា ឆ្នាំ ២០២៥ លោក ខូយ រីដា អភិបាល នៃគណៈអភិបាល ខេត្តពោធិ៍សាត់ បានអញ្ជើញដឹកនាំចលនាបងប្អូន សហគមន៍ កម្លាំង ប្រជាការពារ និងអាជ្ញាធរមូលដ្ឋាន ដាំកូនឈើដើម្បីស្ដារឡើងវិញជាតំបន់បៃតង លើកូនភ្នំដែលត្រូវជន ខិលខូចកាប់បំផ្លាញ និងបន្តចុះត្រួតពិនិត្យវឌ្ឍភាព នៃដំណើរការរៀបចំ ទំនប់បង្ហៀរជើងភ្នំទំព័រ និងភ្នំដាឡៃ ជាកន្លែងទេចរណ៍ ដែលស្ថិតនៅឃុំប្រមោយ ស្រុកវាលវែង ខេត្តពោធិ៍សាត់។
លោកអភិបាលខេត្តបានអំពាវនាវ ដល់ប្រជាពលរដ្ឋគ្រប់រូប ដែលបាននិងកំពុងបន្តអាជីវកម្មកាប់បំផ្លាញព្រៃឈើ ចាប់យកដីព្រៃ ធ្វើជាកម្មសិទ្ធិឯកជន ត្រូវធ្វើការបញ្ឈប់ សកម្មភាពជាបន្ទាន់ នូវទង្វើររបស់ខ្លួន និងការធ្វើអាជីវកម្មព្រៃឈើ ជំនួញដីធ្លីខុសច្បាប់ ដែលជាបទល្មើសដ៏ធ្ងន់ធ្ងរ គឺ ជាគ្រោះមហន្តរាយ ដល់បរិស្ថានធម្មជាតិ ដែលបណ្តាលពីការកាប់បំផ្លាញ ព្រៃឈើនោះ និងបង្ក ជាគ្រោះមហន្តរាយចំពោះ សង្គមជាតិ ។
យើងត្រូវរួម សាមគ្គីគ្នា បណ្តុះឡើងវិញ នូវគំនិតស្រឡាញ់ព្រៃឈើ ថែរក្សាការពារ ព្រៃឈើ និងក្នុង ទស្សនៈសន្សំសំចៃ នៃការប្រើប្រាស់ផល និងអនុផលព្រៃឈើ គ្រប់ប្រភេទគឺគោរពច្បាប់ អនុវត្តន៍ច្បាប់ដើម្បីរួមចំណែកកសាងព្រះរាជាណាចក្រ កម្ពុជាឱ្យទៅជានីតិរដ្ឋ ។
បន្ថែមពីនេះ ចំពោះកូនឈើ ដែលដាំហើយ សូមអាជ្ញាធរគ្រប់ លំដាប់ថ្នាក់ និងប្រជារាស្ត្រនៅទីកន្លែងនោះ មេត្តាបន្តសកម្មចូលរួមថែរក្សា ឱ្យបានហ្មត់ចត់ជាប្រចាំ ដើម្បីឱ្យកូនឈើដុះលូតលាស់ធំ ធាត់ឆាប់រហ័សនិងពុំបាត់បង់ទៅវិញ ។
ក្នុងឱកាសនោះដែរ លោកអភិបាលខេត្ត ក៍បានអំពាវនាវ ដល់រដ្ឋបាលក្រុង/ស្រុក និងអាជ្ញាធរគ្រប់លំដាប់ថ្នាក់ ដឹកនាំចលនាប្រជាពលរដ្ឋ ឱ្យចូលរួមរៀបចំសោភ័ណភាព សណ្តាប់ធ្នាប់ របៀបរៀបរយសាធារណៈ និងអនាម័យបរិស្ថាន នៅតាមដងផ្លូវ ទីសាធារណៈ កន្លែងធ្វើការ និងតាមគេហដ្ឋាន ដើម្បីឱ្យខេត្តពោធិ៍សាត់ស្អាត គ្មានសំរាម និងស្រស់បំព្រងឡើង៕
ប្រភព&រូបភាព÷រដ្ឋបាលខេត្តពោធិ៍សាត់
ដោយ÷ហ៊ុន ធឿន(ដើមអម្ពិល)
