ចិន ប្ដេជ្ញាថា នឹងបន្តធ្វើការជា មួយសហគមន៍អន្តរជាតិ ដើម្បីសន្តិភាព នៅមជ្ឈិមបូព៌ា
ប៉េកាំង៖ ប្រទេសចិន នឹងបន្តធ្វើសកម្មភាពស្របតាមសំណើទាំង៤ របស់ប្រធានាធិបតីចិនលោក ស៊ី ជីនពីង និងធ្វើការជាមួយសហគមន៍អន្តរជាតិ ដើម្បីផ្តល់ការគាំទ្រកាន់តែខ្លាំងសម្រាប់ការចរចាសន្តិភាព និងដើរតួនាទីស្ថាបនាក្នុងការសម្រេចបាននូវសន្តិភាពយូរអង្វែងនៅមជ្ឈិមបូព៌ា នេះបើយោងតាមអ្នកនាំពាក្យក្រសួងការបរទេសចិន នៅពេលឆ្លើយសំណួរអំពីស្ថានភាពនៅអ៊ីរ៉ង់។
អ្នកនាំពាក្យរូបនេះបានលេីកឡេីងថា ចាប់តាំងពីជម្លោះអ៊ីរ៉ង់ បានចាប់ផ្តើមមក ប្រទេសចិនបានខិតខំប្រឹងប្រែងដើម្បីបញ្ចប់ជម្លោះ និងសន្តិភាព ដោយបន្ថែមថា ប្រធានាធិបតី ស៊ី បានដាក់ចេញនូវសំណើទាំងបួនស្តីពីការការពារ និងលើកកម្ពស់សន្តិភាព និងស្ថិរភាពនៅមជ្ឈិមបូព៌ា ហើយប្រទេសចិន និងប៉ាគីស្ថានបានចេញគំនិតផ្តួចផ្តើមប្រាំចំណុចសម្រាប់ការស្តារសន្តិភាព និងស្ថិរភាពនៅក្នុងតំបន់ឈូងសមុទ្រ និងមជ្ឈិមបូព៌ា។
ជំហររបស់ប្រទេសចិនលើស្ថានភាពអ៊ីរ៉ង់គឺច្បាស់លាស់ណាស់។ ជម្លោះនេះបានបង្កការខាតបង់យ៉ាងធ្ងន់ធ្ងរដល់ប្រជាជននៅអ៊ីរ៉ង់ និងប្រទេសក្នុងតំបន់ដទៃទៀត។ ដោយសារការរីករាលដាលនៅតែបន្តកើនឡើង ជម្លោះនេះបានដាក់សម្ពាធយ៉ាងខ្លាំងទៅលើកំណើនសេដ្ឋកិច្ចពិភពលោក ខ្សែសង្វាក់ផ្គត់ផ្គង់ សណ្តាប់ធ្នាប់ពាណិជ្ជកម្មអន្តរជាតិ និងស្ថិរភាពនៃការផ្គត់ផ្គង់ថាមពលពិភពលោក ដែលធ្វើឲ្យប៉ះពាល់ដល់ផលប្រយោជន៍រួមរបស់សហគមន៍អន្តរជាតិ។
អ្នកនាំពាក្យរូបនេះបានបន្ដថា “គ្មានចំណុចណាដែលត្រូវបន្តជម្លោះនេះដែលមិនគួរកើតឡើងតាំងពីដំបូងឡើយ។ ការស្វែងរកមធ្យោបាយដំបូង ដើម្បីដោះស្រាយស្ថានការណ៍គឺជាផលប្រយោជន៍របស់មិនត្រឹមតែសហរដ្ឋអាមេរិក និងអ៊ីរ៉ង់ប៉ុណ្ណោះទេ ប៉ុន្តែក៏ជាផលប្រយោជន៍របស់ប្រទេសក្នុងតំបន់ និងពិភពលោកទាំងមូលផងដែរ”។
អ្នកនាំពាក្យរូបនេះបានបន្ថែមថា បទឈប់បាញ់រវាងសហរដ្ឋអាមេរិក និងអ៊ីរ៉ង់ថ្មីៗនេះ និងកិច្ចខិតខំប្រឹងប្រែងដើម្បីស្វែងរកការដោះស្រាយបញ្ហាតាមរយៈការចរចាត្រូវបានស្វាគមន៍ដោយប្រទេសក្នុងតំបន់ និងសហគមន៍អន្តរជាតិ ដោយបន្ថែមថា ចិនតែងតែជឿជាក់ថា ការសន្ទនា និងការចរចាគឺជាមធ្យោបាយត្រឹមត្រូវឆ្ពោះទៅមុខ ហើយការប្រើប្រាស់កម្លាំងគឺជាផ្លូវទាល់ច្រក៕
ប្រែសម្រួល ឈូក បូរ៉ា
