អេហ្ស៊ីប កាតា អារ៉ាប៊ីសាអូឌីត ពិភាក្សាគ្នាអំពីស្ថានភាពនៅ អ៊ីរ៉ង់និងស៊ូដង់
បរទេស៖ ទីភ្នាក់ងារចិនស៊ិនហួ ចេញផ្សាយនៅថ្ងៃនេះបានឲ្យដឹងថា អ្នកការទូតកំពូលរបស់ប្រទេសអេហ្ស៊ីប កាតា និងអារ៉ាប៊ីសាអូឌីត បានធ្វើការហៅទូរស័ព្ទ ដាច់ដោយឡែកពីគ្នាកាលពីថ្ងៃសុក្រ ដើម្បីដោះស្រាយការវិវឌ្ឍន៍យ៉ាងឆាប់រហ័សនៅក្នុងតំបន់ ដោយផ្តោតលើវិបត្តិអ៊ីរ៉ង់ និងជម្លោះដែលកំពុងបន្តនៅក្នុងប្រទេសស៊ូដង់។
ក្នុងអំឡុងពេលសន្ទនាតាមទូរស័ព្ទ ពីរដាច់ដោយឡែកពីគ្នាជាមួយនាយករដ្ឋមន្ត្រីកាតា និងរដ្ឋមន្ត្រីក្រសួងការបរទេស Sheikh Mohammed bin Abdulrahman bin Jassim Al Thani និងរដ្ឋមន្ត្រីការបរទេសអារ៉ាប៊ីសាអូឌីត ព្រះអង្គម្ចាស់ Faisal bin Farhan bin Abdullah Al Saud រដ្ឋមន្ត្រីការបរទេសអេហ្ស៊ីប Badr Abdelatty បានពិនិត្យមើលការវិវឌ្ឍន៍ចុងក្រោយបង្អស់ ក្នុងកិច្ចខិតខំប្រឹងប្រែងការទូតលើកនេះ។
ដំណោះស្រាយដែលធ្វើឡើងគឺ ដើម្បីដោះស្រាយកង្វល់របស់ភាគីទាំងអស់ រួមទាំងរដ្ឋឈូងសមុទ្រ ខណៈការពង្រឹងសន្តិសុខ និងស្ថិរភាពក្នុងតំបន់ នេះបើយោងតាមសេចក្តីថ្លែងការណ៍ របស់ក្រសួងការបរទេសអេហ្ស៊ីប។
រដ្ឋមន្ត្រីទាំងគ្រប់ភាគីក៏បានពិភាក្សាអំពីការ វិវឌ្ឍន៍នៃវិបត្តិនៅស៊ូដង់ ដែលលោក Abdelatty បានរំលឹកឡើងវិញនូវជំហររឹងមាំរបស់អេហ្ស៊ីប ក្នុងការគាំទ្រការរួបរួម អធិបតេយ្យភាព និងបូរណភាពទឹកដីរបស់ប្រទេសស៊ូដង់។
លោកបានសង្កត់ធ្ងន់លើភាពចាំបាច់ នៃការថែរក្សាស្ថាប័នរដ្ឋជាតិ របស់ប្រទេសស៊ូដង់ ដែលជាសសរស្តម្ភជាមូលដ្ឋាន សម្រាប់ការស្តារសន្តិសុខ និងស្ថិរភាព ខណៈពេលដែលបដិសេធរាល់អង្គភាពស្របគ្នាផងដែរ៕
