បរទេស៖ ប្អូនស្រីមេដឹកនាំកូរ៉េខាងជើង លោក គីម ជុងអ៊ុន តាមសេចក្តីរាយការណ៍ បានធ្វើតួនាទីនាំមុខ ក្នុងយុទ្ធនាការដាក់សម្ពាធថ្មីបន្ថែមទៀត ប្រឆាំងនឹងប្រទេសកូរ៉េខាងត្បូង បង្ហាញឲ្យឃើញនូវអ្វី ដែលអ្នកវិភាគនិយាយថា ជាតួនាទីគោលនយោបាយ ដែលលើសពីតួនាទី ជាជំនួយការរបស់បងប្រុស។
យោងតាមសេចក្តីរាយការណ៍មួយ ដែលចេញផ្សាយ ដោយទីភ្នាក់ងារសារព័ត៌មាន Us News នៅថ្ងៃទី១០ ខែមិថុនា ឆ្នាំ២០២០ បានឲ្យដឹងថា ដោយត្រូវគេជឿថា ស្ថិតក្នុងវ័យ៣០ឆ្នាំនោះ លោកស្រី គីម យូជុង គឺជាសាច់ញាតិជិតតែម្នាក់គត់ របស់មេដឹកនាំកូរ៉េខាងជើង ធ្វើការងារក្នុងផ្នែកនយោបាយ ហើយក្នុងឆ្នាំនេះ បានកាន់តួនាទី គោលនយោបាយសាធារណៈបន្ថែម ពង្រឹងឋានៈ ជាតួអង្គនយោបាយដ៏មានឥទ្ធិពល។
គួរបញ្ជាក់ថា លោកស្រី គីម យូជុង ធ្លាប់ធ្វើការងារនៅក្រោយឆាក ក្នុងទីភ្នាក់ងារឃោសនាផ្សព្វផ្សាយ របស់ប្រទេសកូរ៉េខាងជើង ជាតួនាទីមួយ ដែលនាំឲ្យសហរដ្ឋអាមេរិក ដាក់បន្ថែមរូបនាងចូល ក្នុងបញ្ជីមន្ត្រីជាន់ខ្ពស់រងទណ្ឌកម្ម នៅក្នុងឆ្នាំ២០១៧ ដោយសារតែការរំលោភបំពានសិទ្ធិមនុស្ស និងការត្រួតពិនិត្យ៕ ប្រែសម្រួល៖ប៉ាង កុង
