ភ្នំពេញ ៖ នាយឧត្តមសេនីយ៍ ប៉ែន វិបុល អគ្គស្នងការរងនគរបាលជាតិ និងជាប្រធាននាយកដ្ឋានបុគ្គលិក នារសៀលថ្ងៃទី១៣ ខែសីហា ឆ្នាំ២០២០ ស្អែកនេះ នឹងចុះដោះស្រាយករណីឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ ដែលរងបណ្ដឹងបៀតបៀនផ្លូវភេទ នគរបាលជានារីក្នុងអង្គភាព។
យោងតាមលិខិតរបស់ស្នងការដ្ឋាននគរបាលខេត្តកំពង់ធំ នៅថ្ងៃទី១២ ខែសីហា ឆ្នាំ២០២០ បានឲ្យដឹងថា «សូមអញ្ជើញ លោក-លោកស្រី ស្នងការរងនគរបាលខេត្ត ,លោកអនុប្រធានផែន ,លោកនាយ នាយរងការិយាល័យជំនាញ ,លោកអធិការ អធិការរងនគរបាល ក្រុង ស្រុក លោក ,លោកនាយប៉ុស្ដិ៍នគរបាលរដ្ឋបាល ឃុំ-សង្កាត់ ដើម្បីចូលរួមស្ដាប់ប្រសាសន៍ណែនាំរបស់ថ្នាក់ដឹកនាំ ក្រោមអធិបតីភាព នាយឧត្តមសេនីយ៍ ប៉ែន វិបុល អគ្គស្នងការរង និងជាប្រធាននាយកដ្ឋានបុគ្គលិក»។
សូមជម្រាបថា ក្រុមនគរបាលជានារីនៃស្នងការនគរបាលខេត្តកំពង់ធំ កាលពីថ្ងៃទី៣០ ខែកក្កដា ឆ្នាំ២០២០ បានសរសេរលិខិតគោរពស្នើសុំ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ជួយរកយុត្តិធម៌ជូនពួកគេ ក្រោយពួកគេចោទ លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ បានបៀតបៀន កេរខ្មាស់ពួកខ្លួន។
ក្នុងលិខិតរបស់ក្រុមនគរបាលនាទី បានសរសេររៀបរាប់ថា «នៅអំឡុងឆ្នាំ២០១៨-២០១៩ ពួកនាងខ្ញុំមួយចំនួនត្រូវបានលោក ឧត្តម សេនីយ៍ទោ អ៊ុក កុសល ហៅពួកនាងខ្ញុំឲ្យទៅជួបគាត់នៅក្នុងបន្ទប់ធ្វើការរបស់គាត់ ដើម្បីសួរនាំកិច្ចការងារមួយចំនួន ។ ដោយយល់ឃើញថា គាត់ជាថ្នាក់ដឹកនាំ ពួកនាងខ្ញុំក៏បានទៅជួបគាត់ម្នាក់ម្ដងៗ តាមការណាត់របស់គាត់។ ពេលចូលដល់ក្នុងបន្ទប់តែពីរ នាក់ លោកស្នងការក៏សួរនាំថា ពាក់ស័ក្ដិ៍ប៉ុន្មាន? ហើយ មុខតំណែងជាអ្វីសព្វថ្ងៃ? ហើយចង់បានមុខតំណែង ឬឡើងស័ក្តិអត់? បើចង់បានចាំបងជួយ ព្រោះបង ជាស្នងការ និងជាប្រធានអង្គភាព ចង់ធ្វើអ្វីក៏បានដែរ ឲ្យតែអូនព្រមស្រលាញ់បង ។ ម្យ៉ាងទៀត បើអូនព្រមស្រលាញ់បង កុំបារម្ភខ្លាចមានកូនអី ព្រោះទឹកកាមបងគ្មានមេជីវិតបង្កកំណើតទេ។ ពេលលឺ ពាក្យសំដីទាំងអស់នេះ នាងខ្ញុំហួសចិត្តមិននឹកស្មានថា គាត់ហ៊ាននិយាយពាក្យសំដីបែបនេះ មកលើនាងខ្ញុំជា កូនចៅ»។
ក្រោយមានការស្នើសុំ ពីក្រុមនគរបាលនារី នៅខេត្តកំពង់ធំរួចមក សម្ដេចក្រឡាហោម ស ខេង ក៏បានបញ្ជាឲ្យ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងភាគីពាក់ព័ន្ធមួយចំនួនពិនិត្យរឿងអាស្រូវ របស់លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ ៕ ដោយ ៖ អេង ប៊ូឆេង
