បរទេស៖ វីរុសដែលបំលែងខ្លួនថ្មីប្រភេទ Delta នៅក្នុងប្រទេសថៃ ដែលត្រូវបានរកឃើញនៅក្នុងខេត្ត ៧៤ ក្នុងចំណោម ៧៧ ខេត្ត ហើយនៅតែមិនមានសញ្ញានៃវីរុសដែលបំលែងខ្លួនថ្មី ប្រភេទ Lambda មកពីអាមេរិកខាងត្បូង នោះទេ។ នេះបើយោងតាមនាយកដ្ឋានវិទ្យាសាស្ត្រវេជ្ជសាស្ត្រ។
យោងតាមសារព័ត៌មាន Bangkok Post ចេញផ្សាយនៅថ្ងៃទី៤ ខែសីហា ឆ្នាំ២០២១ បានឱ្យដឹងថា អគ្គនាយកនៃនាយកដ្ឋានវិទ្យាសាស្ត្រវេជ្ជសាស្ត្រ លោក Supakit Sirilak បាននិយាយថា ការស្ទង់មតិចៃដន្យលើអ្នកជំងឺកូវីដ -១៩ ចំនួន ២ ៥៤៧ នាក់ចាប់ពីថ្ងៃទី ២៤ ដល់ថ្ងៃទី ៣០ ខែកក្កដា បានរកឃើញថា ១ ៩៩៣នាក់ (៧៨.២%) មានវីរុសបំលែងខ្លួនថ្មី Delta (រកឃើញដំបូងនៅឥណ្ឌា), អ្នកជំងឺ ៥៣៨នាក់ (២១.២%) មានវីរុសបំលែងខ្លួនថ្មី ប្រភេទ Alpha (រកឃើញដំបូងនៅអង់គ្លេស) ) និង ១៦នាក់ (០,៦%) មានវីរុសបំលែងខ្លួនថ្មី ប្រភេទ Beta (ត្រូវបានកំណត់អត្តសញ្ញាណដំបូងនៅអាហ្វ្រិកខាងត្បូង) ។
សំណាករួមមានអ្នកជំងឺ ១ ២២៩ នាក់នៅទីក្រុងបាងកក ដែលក្នុងនោះ ១ ០៥៩ នាក់ (៨៦.២%) បានឆ្លងមេរោគវីរុស Delta , អ្នកជំងឺ ១៧០នាក់ (១៣.៨%) ឆ្លងវីរុស Alpha ហើយគ្មាននរណាម្នាក់មានវីរុស Beta នោះទេ។
នៅតាមបណ្តាខេត្តផ្សេងទៀតការស្ទង់មតិបានគ្របដណ្តប់លើអ្នកជំងឺចំនួន ១ ៣១៨ នាក់ ដែលក្នុងនោះ ៩៣៤ នាក់(៧០.៩%) មានវីរុស Delta, អ្នកជំងឺ ៣៦៨ នាក់ (២៧.៩%) ឆ្លងវីរុស Alpha និង ១៦នាក់ (១.២%) ឆ្លងវីរុស Beta ៕
ប្រែសម្រួលៈ ណៃ តុលា
