ព័ត៌មានអន្តរជាតិ

លោក Pompeo នឹងអញ្ជើញ មកដល់តំបន់អាស៊ី នឹងជួបចរចាពីបញ្ហាចិន និងកូរ៉េខាងជើង

វ៉ាស៊ីនតោន៖ ទូរទស្សន៍សិង្ហបុរី Channel News Asia បានផ្សព្វផ្សាយព័ត៌មាន ឲ្យដឹងនៅថ្ងៃទី៣០ ខែកញ្ញា ឆ្នាំ២០២០ថា ក្រសួងការបរទេស សហរដ្ឋអាមេរិក បានឲ្យដឹងនៅថ្ងៃទី៣០ ខែកញ្ញានេះថា លោក Mike Pompeo រដ្ឋមន្ត្រីក្រសួងការបរទេស សហរដ្ឋអាមេរិក នឹងធ្វើដំណើរទៅកាន់ប្រទេសជប៉ុន កូរ៉េខាងត្បូង និង ម៉ុងហ្គោលី នៅសប្តាហ៍ក្រោយ ក្នុងដំណើរមួយ ដែលរំពឹងថា នឹងផ្តោតលើចិន និងកូរ៉េខាងជើង។

ដំណើរទស្សនកិច្ចរបស់លោក Pompeo ទៅកាន់ទីក្រុងតូក្យូ នឹងក្លាយជាដំណើរទស្សនកិច្ចលើកដំបូងរបស់មន្ត្រីជាន់ខ្ពស់សហរដ្ឋអាមេរិក ចាប់តាំងពីលោក Yoshihide Suga បានចូលកាន់តំណែងនៅថ្ងៃទី ១៦ ខែកញ្ញា ដោយបានទទួលតំណែងបន្ទាប់ពីនាយករដ្ឋមន្ត្រីជើងចាស់ ស៊ីនហ្សូ អាបេ ដែលជាសម្ព័ន្ធមិត្តជិតស្និទ្ធរបស់ទីក្រុងវ៉ាស៊ីនតោន ។

នៅថ្ងៃទី ៦ ខែតុលា នៅទីក្រុងតូក្យូ លោក Pompeo នឹងបើកកិច្ចប្រជុំ ចំនួន៤ជាមួយសមភាគី របស់លោកមកពីអូស្រ្តាលី ឥណ្ឌា និងជប៉ុន ដើម្បីបង្កើនកិច្ចសហប្រតិបត្តិការ នៅចំពោះមុខប្រទេសចិន ។

លោក Pompeo គឺជាអ្នករិះគន់យ៉ាងខ្លាំងចំពោះប្រទេសចិន លើបញ្ហានានាពីសន្តិសុខដល់សិទ្ធិមនុស្ស រហូតដល់ការរីករាលដាលនៃជំងឺកូវីដ១៩ ដែលរដ្ឋបាលរបស់ប្រធានាធិបតី ដូណាល់ ត្រាំ បានរិះរកការស្តីបន្ទោសយ៉ាងខ្លាំង ទៅលើទីក្រុងប៉េកាំងនៅមុនការ បោះឆ្នោតនៅថ្ងៃទី ៣ ខែវិច្ឆិកា ។

លោក Pompeo បានដឹកនាំយុទ្ធនាការអន្តរជាតិមួយ សម្រាប់ប្រទេសដទៃទៀត ដើម្បីគេចពីប្រទេសចិន រួមទាំងបច្ចេកវិទ្យារបស់ខ្លួនផងដែរ ៕
ប្រែសម្រួលដោយ៖ ម៉ៅ បុប្ផាមករា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top