បរទេស៖ ប្រទេសវៀតណាម បានចរចាដើម្បីទទួលបាននូវវ៉ាក់សាំង បង្ការជំងឺកូវីដ១៩ ចំនួន ៦០ លានដូស ក្នុងចំណោមវ៉ាក់សាំងចំនួន ១៥០ លានដូស ដែលត្រូវការសម្រាប់ឆ្នាំនេះ ដើម្បីគ្របដណ្តប់ ៧០ ភាគរយនៃប្រជាជនចំនួន ៩៨ លាននាក់របស់ខ្លួន។
យោងតាមសារព័ត៌មាន VN Express ចេញផ្សាយកាលពីថ្ងៃទី១៩ ខែកុម្ភៈ ឆ្នាំ២០២១ បានឱ្យដឹងថា ក្រសួងសុខាភិបាលវៀតណាម បានចរចាជាមួយ Covax ដែលជាយន្ដការសកលសម្រាប់ ការអភិវឌ្ឍផលិតកម្មនិងការទទួលយកបេក្ខជនវ៉ាក់សាំង ដែលជួយប្រទេសជាសមាជិក ទទួលបានវ៉ាក់សាំងនៅពេលពួកគេអាចប្រើបាន ដើម្បីផ្តល់ឱ្យប្រទេសវៀតណាម នូវការចាក់វ៉ាក់សាំងចំនួន ៣០ លានដូស ក្នុងឆ្នាំនេះ។ លោក Nguyen Thanh Long រដ្ឋមន្រ្តីសុខាភិបាល វៀតណាម បានប្រាប់កិច្ចប្រជុំកាលពីថ្ងៃសុក្រ។
លោកបន្ថែមថា លើសពីនេះទៀតក្រុមហ៊ុនអង់គ្លេស AstraZeneca បានសន្យាផ្តល់ឱ្យប្រទេសវៀតណាមនូវវ៉ាក់សាំង Oxford / AstraZeneca ប្រហែល ៣០ លានដូសនៅឆ្នាំនេះ។
ការចាក់វ៉ាក់សាំងដំបូងចំនួន ២០៤.០០០ ដូសដំបូងគ្រោងនឹងមកដល់ប្រទេសនេះនៅថ្ងៃទី ២៨ ខែកុម្ភៈ។
ក្រៅពីកិច្ចព្រមព្រៀងជាមួយក្រុមហ៊ុន AstraZeneca ប្រទេសវៀតណាមក៏កំពុងបង្កើនការចរចារ ជាមួយក្រុមហ៊ុន Pfizer និង Moderna របស់អាមេរិករួមជាមួយក្រុមហ៊ុន ផលិតវ៉ាក់សាំងផ្សេងទៀត នៅក្នុងប្រទេសរុស្ស៊ីនិងប្រទេសមួយចំនួនទៀត ដើម្បីធានានូវចំនួនថ្នាំបង្ការ សរុបចំនួន ១៥០ លានដូស សម្រាប់ ៧០ ភាគរយ នៃប្រជាជនរបស់ប្រទេសនៅឆ្នាំនេះ ៕
ប្រែសម្រួលៈ ណៃ តុលា
