ព័ត៌មានអន្តរជាតិ

ប្រេសិតមីយ៉ានម៉ា ប្រាប់សមាជិកសភា អាមេរិកថា ដាក់ទណ្ឌកម្ម បន្ថែមជារឿងចំបាច់

បរទេស៖ ឯកអគ្គរដ្ឋទូតមីយ៉ានម៉ា ប្រចាំនៅអង្គការសហប្រជាជាតិ តាមសេចក្តីរាយការណ៍ បាននិយាយប្រាប់ រដ្ឋសភាសហរដ្ឋអាមេរិក នៅថ្ងៃអង្គារសប្ដាហ៍នេះថា ទីក្រុងវ៉ាស៊ីនតោន គួរតែផ្តោតគោលដៅ លើក្រុមហ៊ុនប្រេងនិងឧស្ម័នដំណើរការដោយរដ្ឋ និងធនាគារកម្មសិទ្ធិរដ្ឋមួយ ដោយការដាក់ទណ្ឌកម្ម។

លោកឯកអគ្គរដ្ឋទូត Kyaw Moe Tun ជាតំណាងរបស់សមាជិករដ្ឋសភាជាប់ឆ្នោត ប្រឆាំងនឹងរបបសឹកយោធា របស់ប្រទេសមីយ៉ានម៉ា នោះ ក៏បានធ្វើការព្រមានថា វិបត្តិដែលបង្កឡើង ដោយរដ្ឋប្រហារថ្ងៃទី០១ ខែកុម្ភៈ នៅក្នុងប្រទេសភូមា បានគម្រាមកំហែង ដល់សន្តិសុខក្នុងតំបន់។

តាមសេចក្តីរាយការណ៍ លោកឯកអគ្គរដ្ឋទូតមីយ៉ានម៉ារូបនេះ បាននិយាយប្រាប់ដល់គណៈកម្មការទទួលបន្ទុកកិច្ចការបរទេសរដ្ឋសភាថា ដូចគ្នាទៅនឹងធនាគារ Myawaddy និង Innwa ដែលដំណើរការដោយយោធានោះ សហរដ្ឋអាមេរិកគួរតែដាក់ទណ្ឌកម្ម លើធនាគារពាណិជ្ជបរទេសមីយ៉ានម៉ាដែលកាន់កាប់ដោយរដ្ឋ MFTB និងសហគ្រាសប្រេងនិងឧស្ម័នមីយ៉ានម៉ា MOGE។
គួរបញ្ជាក់ថា នាពេលថ្មីៗនេះ រដ្ឋបាលលោក បៃដិន បានធ្វើការថ្កោលទោសចំពោះរដ្ឋប្រហារនៅភូមា និងបានដាក់ទណ្ឌកម្មលើឧត្តមសេនីយ៍ ដែលដឹកនាំរដ្ឋប្រហារ ក៏ដូចជាសមាជិកគ្រួសារពួកគេខ្លះ និងជំនួញដែលផ្តល់ប្រាក់ចំណូលដល់ពួកគេ៕

ប្រែសម្រួល៖ប៉ាង កុង

To Top