ព័ត៌មានអន្តរជាតិ

រដ្ឋាភិបាលវេណេស៊ុយអេឡា និងក្រុមប្រឆាំង ព្រមព្រៀងគ្នាលើចំណុចសំខាន់ខ្លះៗ ក្នុងអំឡុងកិច្ចពិភាក្សានៅម៉ិកស៊ិក

បរទេស៖ រដ្ឋាភិបាលវេណេស៊ុយអេឡា និងតំណាងមកពីក្រុមប្រឆាំង បាននិយាយថា ពួកគេទើបបានព្រមព្រៀងគ្នាខ្លះៗ នៅក្នុងអំឡូងកិច្ចពិភាក្សាគ្នាក្នុងទីក្រុង Mexico City ជាផ្នែកនៃគំនូសបង្ហាញផ្លូវ ធ្វើឡើងដើម្បីដោះស្រាយវិបត្តិរ៉ាំរ៉ៃក្នុងប្រទេស។


នៅក្នុងសេចក្តីថ្លែងការណ៍រួមគ្នាមួយ ក្រោយកិច្ចចរចាធ្វើឡើងចាប់ពីថ្ងៃសុក្រដល់ថ្ងៃចន្ទនោះ ពួកគេបាននិយាយថា ចំណុចនៃកិច្ចព្រមព្រៀងនោះ មានជាប់ទាក់ទងនឹងវិធានការសង្គម ជាពិសេសលើអ្នកដែលរងផលប៉ះពាល់ដោយសារតែជម្ងឺកូវីដ១៩ និងជម្លោះទឹកដីពាក់ព័ន្ធនឹងប្រទេសហ្គីយ៉ាណា ដែលស្ថិតនៅជិតខាង។


តំណាងមកពីភាគីទាំងពីរ បាននិយាយថា កិច្ចពិភាក្សាគ្នាស្តីពីវិធានការសេដ្ឋកិច្ចនិងសង្គមនានា រួមមានទាំងសិទ្ធិពិសេស ជាមួយមូលនិធិរូបិយប័ណ្ណអន្តរជាតិ នឹងបន្តធ្វើនៅក្នុងកិច្ចពិភាក្សាគ្នាជុំបន្ទាប់ នេះបើយោងតាមសេចក្តីរាយការណ៍មួយ ដែលចេញផ្សាយដោយទីភ្នាក់ងារសារព័ត៌មាន CGTN នៅថ្ងៃទី០៧ ខែកញ្ញា ឆ្នាំ២០២១។


លោក Jorge Rodriguez ជាប្រធានរដ្ឋសភានៃប្រទេសវេណេស៊ុយអេឡា និងជាប្រមុខនៃគណៈប្រតិភូរដ្ឋាភិបាល បានមានប្រសាសន៍ថា “យើងមានផ្លូវដ៏វែងឆ្ងាយត្រូវទៅ យើងមានការងារជាច្រើនត្រូវធ្វើ យើងមានបញ្ហាជាច្រើនត្រូវពិភាក្សា ប៉ុន្តែនៅថ្ងៃនេះ យើងបានបង្ហាញថា យើងអាចនិយាយរឿងដ៏លំបាកបំផុតចំពោះយើងខ្លួនឯង”៕


ប្រែសម្រួល៖ប៉ាង កុង

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×