ព័ត៌មានអន្តរជាតិ

ជប៉ុន អាមេរិក អឺរ៉ុប ព្រមព្រៀងសហការគ្នា ជុំវិញស្ថានភាពនៅអាហ្វហ្គានីស្ថាន


តូក្យូ៖ រដ្ឋាភិបាលជប៉ុន បានឲ្យដឹងថា រដ្ឋមន្ត្រីការបរទេសមកពីប្រទេសជប៉ុន សហរដ្ឋ អាមេរិក អឺរ៉ុប និងកន្លែងផ្សេងទៀតកាលពីថ្ងៃពុធ បានព្រមព្រៀងធ្វើការរួមគ្នាក្នុងការដោះស្រាយស្ថានការណ៍នៅអាហ្វហ្កានីស្ថាន ខណៈភាគីទាំង៣ ស្វែងរកការធានាការចាកចេញប្រកបដោយសុវត្ថិភាព សម្រាប់អ្នកដែលភៀសខ្លួនចេញពីប្រទេស ដែលគ្រប់គ្រងដោយក្រុមតាលីបង់។

ដោយមានការព្រួយបារម្ភកាន់តែខ្លាំងឡើងថា ភាពមិនច្បាស់លាស់ និងអសន្តិសុខអាចនាំឱ្យមានវិបត្តិមនុស្សធម៌នៅអាហ្វហ្គានីស្ថាន រដ្ឋមន្ត្រីការបរទេសជប៉ុនលោក Toshimitsu Motegi បានសន្យាក្នុងអំឡុងពេលកិច្ចប្រជុំតាមអ៊ិនធឺណិតថា នឹងផ្តល់ជំនួយថ្មីៗចំនួន ៦៥ លានដុល្លារតាមរយៈអង្គការអន្តរជាតិ ដើម្បីជួយដល់ប្រជាជនក្នុងតំបន់ ជាមួយជម្រក ម្ហូបអាហារ ទឹក និងតម្រូវការផ្សេងទៀត។

ក្រសួងការបរទេសជប៉ុន បានឲ្យដឹងនៅក្នុងសេចក្តីប្រកាសព័ត៌មានមួយថា កិច្ចប្រជុំដែលរៀបចំឡើងដោយរដ្ឋមន្ត្រីការបរទេសអាមេរិកលោក Antony Blinken និងរដ្ឋមន្ត្រីការបរទេសអាល្លឺម៉ង់ Heiko Maas ត្រូវបានចូលរួមដោយអ្នកចូលរួមមកពីប្រទេសចំនួន ២២ ។

លោក Motegi បានឲ្យដឹងមុននេះថា កិច្ចប្រជុំនេះត្រូវបានរំពឹងថា នឹងមានការចូលរួមពីប្រទេសចិន និងរុស្ស៊ី ប៉ុន្តែប្រទេសទាំងពីរ មិនត្រូវបានលើកឡើងនៅក្នុងសេចក្តីប្រកាសព័ត៌មាននោះទេ។

លោក Blinken បានរៀបចំកិច្ចប្រជុំនៅប្រទេសអាល្លឺម៉ង់ ក្នុងដំណើរជើងទីពីរ ដែលបាននាំលោកទៅកាន់ប្រទេសកាតា បន្ទាប់ពីការដកកងទ័ពអាមេរិកចេញពីអាហ្វហ្គានីស្ថាន កាលពីចុងខែមុន។ ការដកខ្លួនចេញ គឺជាការបញ្ចប់សង្គ្រាមពីរទសវត្សរ៍ ដែលបង្កឡើងដោយការវាយប្រហារភេរវកម្មថ្ងៃទី១១ ខែកញ្ញា ឆ្នាំ២០០១ នៅលើទឹកដីអាមេរិក។

ប៉ុន្តែការកាន់កាប់អាហ្វហ្គានីស្ថានយ៉ាងឆាប់រហ័សដោយមិននឹកស្មានដល់ដោយក្រុមតាលីបង់ ដែលជាក្រុមឥស្លាមនិយមក្នុងអំឡុងពេលការដកទ័ពរបស់អាមេរិក បាននាំឱ្យមានដំណើរការជម្លៀសដ៏ច្របូកច្របល់នៅឯអាកាសយានដ្ឋានអន្តរជាតិក្នុងទីក្រុងកាប៊ុល ខណៈដែលជនជាតិអាហ្វហ្គានីស្ថានជាច្រើន ដែលបានធ្វើការជាមួយសហរដ្ឋអាមេរិក បានប្រញាប់ប្រញាល់រត់ចេញពីប្រទេសដោយខ្លាចពួកគេត្រូវរស់នៅក្រោមអ្នកគ្រប់គ្រងថ្មី៕

ដោយ ឈូក បូរ៉ា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top