វ៉ាស៊ីនតោន៖ ក្រុមហ៊ុនជីវបច្ចេកវិទ្យាអាមេរិក Moderna Inc. បានឲ្យដឹងថា ការចាក់វ៉ាក់សាំងដូសជំរុញការពារមេរោគឆ្លងវីរុសរបស់ខ្លួនត្រូវបានបង្ហាញនៅក្នុងការធ្វើតេស្តមន្ទីរពិសោធន៍ ដើម្បីបង្កើនអង្គបដិប្រាណយ៉ាងសំខាន់ ដែលនឹងប្រឆាំងនឹងទម្រង់ថ្មីអូមីក្រុង ដែលអាចឆ្លងបានខ្ពស់។
សេចក្តីប្រកាសនេះបានធ្វើឡើងនៅពេលដែលសហរដ្ឋអាមេរិក កំពុងមើលឃើញការកើនឡើងករណីឆ្លងមេរោគថ្មីមួយទៀត ដោយទម្រង់អូមីក្រុង Omicron មានចំនួនប្រហែល ២/៣ នៃការឆ្លងថ្មីកាលពីសប្តាហ៍មុន នេះបើយោងតាមទិន្នន័យចុងក្រោយពីមជ្ឈមណ្ឌលគ្រប់គ្រង និងការពារជំងឺ។
ទិន្នន័យបឋមពីការធ្វើតេស្តមន្ទីរពិសោធន៍នៅក្នុងការសិក្សារបស់ Moderna បានបង្ហាញថា វគ្គចាក់វ៉ាក់សាំងពីរដង ដោយការចាក់នីមួយៗមានផ្ទុកថ្នាំ ១០០មីក្រូក្រាម ផ្តល់តែកម្រិតទាបនៃអង្គបដិប្រាណប៉ុណ្ណោះ ប៉ុន្តែការអនុញ្ញាតបច្ចុប្បន្ន ៥០មីក្រូក្រាមដូសជំរុញ បានបង្កើនកម្រិតអង្គបដិប្រាណ ៣៧ដង ក្នុងរយៈពេល ២៩ថ្ងៃបន្ទាប់ពីការចាក់វ៉ាក់សាំង។
ក្រុមហ៊ុនបានឲ្យដឹងថា ដោយសារភាពខ្លាំងនៃវ៉ាក់សាំង និងល្បឿនដែលទម្រង់អូមីក្រុង កំពុងរីករាលដាល “ខ្សែការពារទីមួយរបស់ Moderna ប្រឆាំងនឹងអូមីក្រុង នឹងក្លាយជាកម្រិតថ្នាំជំរុញ” ។
ការស្រាវជ្រាវក៏បានបង្ហាញផងដែរថា ការចាក់វ៉ាក់សាំងបង្កើនកម្រិត ១០0មីក្រូក្រាម បង្កើនកម្រិតអង្គបដិប្រាណប្រហែល ៨៣ដង ហើយត្រូវបានគេរកឃើញថា “មានសុវត្ថិភាពជាទូទៅ” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ផលប៉ះពាល់រយៈពេល ៧ថ្ងៃបន្ទាប់ពីការទទួលដូសជំរុញ ក៏ “អាចប្រៀបធៀបបានជាទូទៅទៅនឹងថ្នាំដែលបានឃើញបន្ទាប់ពីការចាក់ពីរដូសដំបូង” ប៉ុន្តែប្រតិកម្មមិនល្អត្រូវបានគេឃើញញឹកញាប់ជាងបន្តិចបន្ទាប់ពីការចាក់ថ្នាំ ១០០មីក្រូក្រាមទាក់ទងទៅនឹងកម្រិតថ្នាំ ៥០ មីក្រូក្រាម។
ក្រុមហ៊ុន Moderna បានឲ្យដឹងថា ខ្លួននឹងបន្តបង្កើតវ៉ាក់សាំងជាក់លាក់ទៅនឹងទម្រង់ឆ្លងអូមីក្រុង ដែលផ្តល់ “ការគំរាមកំហែងរយៈពេលវែង” ដែលបង្ហាញដោយការគេចចេញពីភាពស៊ាំរបស់ទម្រង់ថ្មីនេះ ដោយរំពឹងថានឹងឈានទៅដល់ការសាកល្បងព្យាបាលនៅដើមឆ្នាំ២០២២៕ដោយ ឈូក បូរ៉ា
