ព័ត៌មានអន្តរជាតិ

អ៊ុយក្រែនព្រមានថា រុស្ស៊ីកំពុងរៀបចំវាយប្រហារដោយមីស៊ីលជាថ្មី លើបណ្ដាញថាមពលរបស់ខ្លួនក្នុងពេលអ៊ុយក្រែនកំពុងត្រជាក់ខ្លាំង

បរទេស៖ អ៊ុយក្រែនបាននិយាយនៅថ្ងៃចន្ទថា ប្រទេសរុស្ស៊ីកំពុងរៀបចំសម្រាប់រលកថ្មីនៃការវាយប្រហារដោយមីស៊ីលលើបណ្តាញថាមពលរបស់ខ្លួន ដែលបានធ្វើឱ្យប្រទេសនេះធ្លាក់ចូលទៅក្នុងភាពត្រជាក់ និងងងឹតសូន្យសុង។

យោងតាមសារព័ត៌មាន The Moscow Times ចេញផ្សាយនៅ
ថ្ងៃទី២៨ ខែវិច្ឆិកា ឆ្នាំ២០២២ បានឱ្យដឹងថា អ្នកនាំពាក្យយោធាអ៊ុយក្រែនបាននិយាយថា កប៉ាល់ចម្បាំងរុស្ស៊ីដែលមានសមត្ថភាពបាញ់មីស៊ី Cruise ថ្មីៗនេះបានដាក់ពង្រាយទៅកាន់សមុទ្រខ្មៅជាមួយនឹងមីស៊ីលប្រភេទ Kalibr នៅលើនាវា។

អ្នកនាំពាក្យគឺលោកស្រី Natalia Gumeniuk បាននិយាយថា “នេះបង្ហាញថាការរៀបចំ គឺកំពុងដំណើរការ។

លោកស្រីបាន​បន្ថែម​ថា៖ «វា​ទំនង​ជា​ដែល​ដើម​សប្តាហ៍​នេះ​នឹង​ត្រូវ​បាន​កត់​សម្គាល់​ដោយ​ការ​វាយ​ប្រហារ​បែប​នេះ»។

ជាមួយនឹងសីតុណ្ហភាពធ្លាក់ចុះក្រោមសូន្យ ការវាយប្រហាររបស់រុស្សីម្តងហើយម្តងទៀតបានធ្វើឱ្យបណ្តាញថាមពលរបស់អ៊ុយក្រែនធ្លាក់ចុះដល់កម្រិតនៃការដួលរលំ ហើយបានរំខានការផ្គត់ផ្គង់ថាមពល និងទឹកដល់មនុស្សរាប់លាននាក់ក្នុងរយៈពេលប៉ុន្មានសប្តាហ៍ថ្មីៗនេះ។

ប្រធានាធិបតីអ៊ុយក្រែនលោក Volodymyr Zelensky បានព្រមាននៅក្នុងសុន្ទរកថាទៅកាន់ប្រជាជនអ៊ុយក្រែនកាលពីល្ងាចថ្ងៃអាទិត្យថា រុស្ស៊ីកំពុងរៀបចំការវាយប្រហារតាមអាកាសថ្មី។

លោកបាននិយាយថា កងកម្លាំងរបស់ទីក្រុងម៉ូស្គូនឹងបន្តយុទ្ធនាការនៃការវាយប្រហារជាប្រព័ន្ធ “ដរាបណាពួកគេមានមីស៊ីល”។

លោក Zelensky បានបន្ថែមថា យោធាកំពុងរៀបចំខ្លួន រួមជាមួយនឹងសម្ព័ន្ធមិត្តលោកខាងលិច ដែលបាននិងកំពុងផ្តល់ប្រព័ន្ធការពារអាកាសថ្មីដល់អ៊ុយក្រែនផងដែរ៕ប្រែសម្រួលៈ ណៃ តុលា

To Top