វ៉ាស៊ីនតោន៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី៥ ខែមីនា ឆ្នាំ២០២៣ថា លោក ចូ បៃដិន ប្រធានាធិបតីសហរដ្ឋអាមេរិក និងលោក Olaf Scholz អធិការបតីអាល្លឺម៉ង់ បានប្តេជ្ញាកាលពីថ្ងៃសុក្រថា នឹងបន្តដាក់បន្ទុកលើប្រទេសរុស្ស៊ី សម្រាប់សង្គ្រាមរបស់ខ្លួន នៅក្នុងប្រទេសអ៊ុយក្រែន ដែលឥឡូវនេះជាឆ្នាំទី២ររបស់ខ្លួន ខណៈដែលមន្ត្រីសហភាពអឺរ៉ុប បានថ្លែងថា សព្វាវុធណាដែលផ្តល់ដោយចិន ដល់រុស្ស៊ីនឹងបង្កឡើង ជាទណ្ឌកម្មកាន់តែធ្ងន់ ។
មន្ត្រីរដ្ឋបាលជាន់ខ្ពស់ម្នាក់បានលើកឡើងថា លោក បៃដិន និងលោក Scholz បានជួបគ្នាជាលក្ខណៈឯកជន នៅក្នុងការិយាល័យរាងពងក្រពើ អស់រយៈពេលជាង១ម៉ោង ។ ការពិភាក្សារបស់ពួកគេបានផ្តោតលើសារៈសំខាន់ នៃការបន្ត “សាមគ្គីភាពជាសកល” ជាមួយប្រជាជនអ៊ុយក្រែន និងការខិតខំប្រឹងប្រែងជាបន្តបន្ទាប់ ក្នុងការផ្តល់ជំនួយផ្នែកសន្តិសុខ មនុស្សធម៌ សេដ្ឋកិច្ច និងនយោបាយដល់អ៊ុយក្រែន ផងដែរ ។
អង្គុយនៅក្បែរ លោក Scholz ក្នុងការិយាល័យរាងពងក្រពើ លោក បៃដិន បានថ្លែងអំណរគុណដល់មេដឹកនាំអាល្លឺម៉ង់សម្រាប់ “ភាពជាអ្នកដឹកនាំដ៏រឹងមាំ និងស្ថិរភាព” និងការគាំទ្រសម្រាប់អ៊ុយក្រែន ។ លោក Scholz បានថ្លែងថា វាជារឿងសំខាន់ដើម្បីបង្ហាញថា សម្ព័ន្ធមិត្តនឹងគាំទ្រក្រុង គៀវ “ដរាបណាប្រទេសនេះត្រូវការ និងដរាបណាចាំបាច់” ៕ ប្រែសម្រួលដោយ៖ ម៉ៅ បុប្ផាមករា
