ញូវយ៉ក៖ ប្រតិបត្តិករ និងឆ្មាំសមុទ្រអាមេរិកបានឲ្យដឹងថា មនុស្សទាំងប្រាំនាក់នៅលើនាវាមុជទឹក ដែលបាត់នោះត្រូវបានគេសន្មត់ថា បានស្លាប់បន្ទាប់ពីយាននេះ បានធ្លាក់ក្នុងជម្រៅជ្រៅ នៃមហាសមុទ្រអាត្លង់ទិក នៅជិតបំណែកនៃកប៉ាល់ខ្មោចទីតានិច។
ក្រុមហ៊ុន OceanGate Inc របស់សហរដ្ឋអាមេរិកបានឲ្យដឹង នៅក្នុងសេចក្តីថ្លែងការណ៍មួយថា ខ្លួនជឿថានាយកប្រតិបត្តិរបស់ខ្លួនគឺលោក Stockton Rush ដែលជាអ្នកបើកបរយាន និងមនុស្ស ៤នាក់ផ្សេងទៀត នៅលើយាន Titan “បានបាត់បង់ដោយសោកសៅបំផុត” ។
នាវាមុជទឹកនេះបានបាត់ខ្លួន កាលពីថ្ងៃអាទិត្យនៅភាគខាងជើងអាត្លង់ទិក ពីប្រទេសកាណាដាក្នុងអំឡុងពេល ដំណើរកម្សាន្តក្រោមបាតសមុទ្រ ដើម្បីមើលបំណែកនៃនាវាដឹកអ្នកដំណើរ ដ៏ប្រណិតដែលបានលិចនៅឆ្នាំ១៩១២ ។
ឆ្មាំឆ្នេរសមុទ្របានឲ្យដឹងថា កំទេចកំទីពីនាវាមុជទឹកនេះ ត្រូវបានរកឃើញនៅចំណុចជិត ២០០ ម៉ែត្រពីកប៉ាល់ទីតានិច។ លោក John Mauger បានប្រាប់អ្នកយកព័ត៌មានថា “កំទេចកំទីគឺស្របជាមួយនឹង ការបាត់បង់ដ៏មហន្តរាយនៃបន្ទប់សម្ពាធ” ។
លោក Mauger បានលើកឡើងថា “តាងនាមឱ្យឆ្មាំឆ្នេរសមុទ្រសហរដ្ឋអាមេរិក និងបញ្ជាការបង្រួបបង្រួមទាំងមូល ខ្ញុំសូមចូលរួមរំលែកទុក្ខដ៏ក្រៀមក្រំបំផុត របស់ខ្ញុំចំពោះក្រុមគ្រួសារ” ។ នាវាមុជទឹក Titan បានបាត់ខ្លួនជិតពីរម៉ោង បន្ទាប់ពីវាបានចុះទៅក្នុងសមុទ្រ កាលពីព្រឹកថ្ងៃអាទិត្យ នេះបើយោងតាមឆ្មាំឆ្នេរសមុទ្រ។
យោងតាមក្រុមហ៊ុន និងប្រព័ន្ធផ្សព្វផ្សាយអាមេរិក បានឱ្យដឹងថា អ្នកជិះយន្តហោះ ៤នាក់ផ្សេងទៀត មានពាណិជ្ជករជនជាតិអង់គ្លេសលោក Hamish Harding អ្នកជំនាញមុជទឹកបារាំងលោក Paul-Henri Nargeolet និងអ្នកជំនួញអង់គ្លេស-ប៉ាគីស្ថាន Shahzada Dawood ជាមួយកូនប្រុសជំទង់របស់លោកឈ្មោះ Suleman ៕
ប្រែសម្រួល ឈូក បូរ៉ា
