បរទេស៖ សហរដ្ឋអាមេរិកកំពុងព្យាយាម ក្នុងការតាមដានប្រាក់ជំនួយ រាប់ពាន់លានដុល្លារ ដែលខ្លួនបានបញ្ជូនទៅ ទីក្រុងគៀវតាំងពីខែកុម្ភៈ ឆ្នាំ២០២២ ដែលប្រសិទ្ធភាពអាចនឹងត្រូវ កាត់បន្ថយដោយអំពើពុករលួយ របស់រដ្ឋាភិបាល និងឯកជននៅអ៊ុយក្រែន។ នេះជាការរកឃើញថ្មីបំផុតរបស់ ការិយាល័យអធិការកិច្ចនៃ ក្រសួងការបរទេសសហរដ្ឋអាមេរិក (OIG)។
យោងតាមសារព័ត៌មាន RT ចេញផ្សាយនៅថ្ងៃទី២៧ ខែកក្កដា ឆ្នាំ២០២៣ បានឱ្យដឹងថា កំណែដែលបានកែសម្រួលឡើងវិញ នៃរបាយការណ៍ OIG របស់ក្រសួងការបរទេស ដែលបានចេញផ្សាយនៅសប្តាហ៍នេះ កត់សម្គាល់ថា “អំពើពុករលួយនៅក្នុងរដ្ឋាភិបាលអ៊ុយក្រែន និងវិស័យឯកជនបង្កហានិភ័យដល់ ប្រសិទ្ធភាពនៃជំនួយបរទេសរបស់ សហរដ្ឋអាមេរិកក្នុងរយៈពេលដ៏យូរជាងនេះ”។
OIG បន្ថែមថា ការព្រួយបារម្ភអំពីអំពើ ពុករលួយត្រូវបានកត់ត្រាយ៉ាងល្អ ហើយក្រសួងការបរទេសអាមេរិក “មានបំណងបង្កើតផែនការដើម្បីដោះស្រាយ ការប្រឆាំងអំពើពុករលួយទាក់ទងនឹង ជំនួយដល់អ៊ុយក្រែន រួមទាំងការកសាងប្រទេសអ៊ុយក្រែនឡើងវិញ”។
យោងតាមរបាយការណ៍ គឺសភាអាមេរិកបានផ្ដល់ជំនួយជាង ១១៣,៤ ពាន់លានដុល្លារសម្រាប់អ៊ុយក្រែន ចាប់តាំងពីអរិភាពជាមួយរុស្ស៊ី បានកើនឡើងកាលពីឆ្នាំមុន។ ក្រសួងការបរទេសបានទទួលខុសត្រូវ លើទឹកប្រាក់ប្រហែល ៣១ ពាន់លានដុល្លារដែលក្នុងនោះ ២២,៩ ពាន់លានដុល្លារ ត្រូវបានសម្គាល់ថាជា “ជំនួយថវិកាផ្ទាល់” សម្រាប់រដ្ឋាភិបាលអ៊ុយក្រែន។ ការពិនិត្យឡើងវិញរបស់ OIG ផ្តោតលើតែមូលនិធិទាំងនេះ ដែលគ្រប់គ្រងដោយការិយាល័យសម្របសម្រួល នៃជំនួយសហរដ្ឋអាមេរិកសម្រាប់អឺរ៉ុប និងអឺរ៉ាស៊ី (EUR/ACE) ហើយមិនមែនជំនួយយោធារាប់សិបពាន់លាន ដែលឆ្លងកាត់មន្ទីរបញ្ចកោណនោះទេ៕
ប្រែសម្រួលៈ ណៃ តុលា
