បរទេស ៖ រដ្ឋមន្ត្រីការបរទេសអាហ្សង់ទីន ដែលជាប់ឆ្នោតជាប្រធានាធិបតី គឺលោក Javier Milei បានប្រកាសថា អាហ្សង់ទីន នឹងមិនចូលរួមជាមួយ ក្រុមប្រទេស BRICS ដែលជាក្រុមអន្តរជាតិ នៃបណ្តាប្រទេស ដែលត្រូវបានគេមើលឃើញ កាន់តែខ្លាំងឡើងថា ត្រូវបានដឹកនាំដោយទីក្រុងប៉េកាំង ក្នុងគោលបំណងប្រកួតប្រជែង គំនិតផ្តួចផ្តើម ដែលដឹកនាំ ដោយប្រទេសប្រជាធិបតេយ្យ លោកខាងលិច។
យោងតាមសារព័ត៌មាន VOA ចេញផ្សាយនៅថ្ងៃទី១ ខែធ្នូ ឆ្នាំ២០២៣ បានឱ្យដឹងថា ការប្រកាសកាលពីថ្ងៃព្រហស្បតិ៍ដោយ លោកស្រី Diana Mondino បង្ហាញពីការច្រានចោល នៃការសម្រេចចិត្តដ៏សំខាន់ ដែលធ្វើឡើងដោយរដ្ឋាភិបាលដែលកំពុងដំណើរការ ដែលត្រូវបានគេមើលឃើញថា ជាការទាញរដ្ឋាភិបាលទីក្រុង Buenos Aries ឱ្យកាន់តែខិតទៅជិតគន្លងរបស់ប្រទេសចិន។ ការច្រានចោលនេះ ក៏កើតមានផងដែរ បើទោះបីជាមានលិខិតផ្ទាល់ខ្លួន របស់មេដឹកនាំកុម្មុយនិស្តចិន លោក ស៊ី ជិនពីង បានសរសេរ និងបានប្រគល់ដល់ដៃលោក Milei កាលពីសប្តាហ៍មុនក៏ដោយ ។
ជំហររបស់រដ្ឋាភិបាល លោកប្រធានាធិបតី Milei ដែលចូលមកលើ BRICS ត្រូវបានឃ្លាំមើលយ៉ាងដិតដល់។ នៅលើដំណើរនៃយុទ្ធនាការនេះ លោក Milei គឺជាអ្នករិះគន់យ៉ាងចាស់ដៃ ចំពោះប្រព័ន្ធនយោបាយរបស់ប្រទេសចិន ។ ផ្ទុយទៅវិញ គូប្រជែងរបស់គាត់គឺលោក Sergio Massa ដែលជារដ្ឋមន្ត្រី ទទួលបន្ទុកកិច្ចការសេដ្ឋកិច្ច នៅក្នុងរដ្ឋាភិបាល ដែលកំពុងជិតផុតអាណត្តិ បានស្វាគមន៍ការកើនឡើង នៃជំហានរបស់ប្រទេសចិន នៅក្នុងប្រទេស របស់ពួកគេដោយបើកចំហរ សូម្បីតែការនិយាយលេងអំពីសាធារណរដ្ឋថ្មីមួយក្រោមឈ្មោះ “Argenchina”, នេះបើតាមសារព័ត៌មាន Bloomberg និងប្រព័ន្ធផ្សព្វផ្សាយផ្សេងទៀត បានរាយការណ៍។
BRICS ជាអក្សរកាត់សម្រាប់ ប្រេស៊ីល រុស្ស៊ី ឥណ្ឌា ចិន អាហ្រ្វិកខាងត្បូង – ត្រូវបានគេមើលឃើញកាន់តែខ្លាំងឡើងថា ជាក្រុមភូមិសាស្ត្រនយោបាយ ដែលដឹកនាំដោយទីក្រុងប៉េកាំង ដែលស្វែងរកការពង្រីកឥទ្ធិពលរបស់ខ្លួន និងរៀបចំសណ្តាប់ធ្នាប់អន្តរជាតិឡើងវិញ។
កាលពីឆ្នាំមុន ឯកអគ្គរដ្ឋទូតអាហ្សង់ទីនប្រចាំប្រទេសចិនបានលាតត្រដាងថា លោក ស៊ី បានបន្តការអញ្ជើញអាហ្សង់ទីនឱ្យចូលរួមជាមួយក្រុម។ ការអញ្ជើញនេះត្រូវបានធ្វើឡើងជាផ្លូវការនៅក្នុងកិច្ចប្រជុំកំពូល BRICS ថ្មីបំផុតដែលបានធ្វើឡើងនៅក្នុងខែសីហានៅទីក្រុង Johannesburg ប្រទេសអាហ្វ្រិកខាងត្បូង ដែលជាកន្លែងដែលវាត្រូវបានប្រកាសថា សមាជិកភាពរបស់អាហ្សង់ទីន រួមជាមួយអ៊ីរ៉ង់ អេហ្ស៊ីប អេត្យូពី អារ៉ាប៊ីសាអូឌីត និងអារ៉ាប់រួមនឹងចូលជាធរមាន នៅថ្ងៃទី១ ខែមករា ឆ្នាំ២០២៤ ៕
ប្រែសម្រួលៈ ណៃ តុលា
