វីយែន ៖ ទីភ្នាក់ងារថាមពល បរមាណូអន្តរជាតិ (IAEA) បានឲ្យដឹងថា ការវាយប្រហារដោយយន្តហោះដ្រូន នៅរោងចក្រថាមពល នុយក្លេអ៊ែរ Zaporizhzhia (ZNPP) កាលពីថ្ងៃអាទិត្យ បានបណ្តាលឱ្យខូចខាត ដល់អង្គភាពថាមពលមួយ ក្នុងចំណោមអង្គភាព ថាមពលទាំង៦ របស់ខ្លួន ប៉ុន្តែសុវត្ថិភាពនុយក្លេអ៊ែរ មិនត្រូវបានសម្របសម្រួល នោះទេ។
អ្នកឃ្លាំមើល នុយក្លេអ៊ែរ របស់អង្គការសហប្រជាជាតិ បានឲ្យដឹងថា “ការខូចខាតនៅអង្គភាពទី៦ មិនបានធ្វើឱ្យខូច ដល់សុវត្ថិភាព នុយក្លេអ៊ែរទេ ប៉ុន្តែនេះគឺ ជាឧប្បត្តិហេតុដ៏ធ្ងន់ធ្ងរមួយ ដែលមានសក្តានុពលធ្វើឱ្យខូច ដល់សុចរិតភាព នៃប្រព័ន្ធផ្ទុករបស់ ម៉ាស៊ីនរ៉េអាក់ទ័រ” ដោយបន្ថែមថា ជនរងគ្រោះម្នាក់ត្រូវបានរាយការណ៍ នៅក្នុងការវាយប្រហារនេះ។
IAEA បានឲ្យដឹងនៅលើវេទិកា ប្រព័ន្ធផ្សព្វផ្សាយសង្គម X ថាអ្នកជំនាញរបស់ខ្លួន “បានបញ្ជាក់ពីផលប៉ះពាល់ រាងកាយនៃការវាយប្រហារ ដោយយន្តហោះដ្រូននៅ ZNPP នៅថ្ងៃនេះ រួមទាំងនៅម៉ាស៊ីនរ៉េអាក់ទ័រ មួយក្នុងចំណោមម៉ាស៊ីន រ៉េអាក់ទ័រទាំង៦ របស់ខ្លួន” ។
នៅក្នុងសេចក្តីថ្លែងការណ៍ ដាច់ដោយឡែកមួយ អគ្គនាយក IAEA លោក Rafael Grossi បានឲ្យដឹងនៅលើបណ្ដាញ X ថា អ្នកជំនាញ របស់ទីភ្នាក់ងារ ដែលឈរជើងនៅ ZNPP បានបញ្ជាក់ថា “ការប៉ះទង្គិចដោយផ្ទាល់ យ៉ាងហោចណាស់បីដងប្រឆាំង នឹងរចនាសម្ព័ន្ធផ្ទុករបស់ម៉ាស៊ីន រ៉េអាក់ទ័រធំ ZNPP” បានកើតឡើងនៅមុនថ្ងៃនោះ។
លោក Grossi បានលើកឡើងថា “ការវាយប្រហារដោយ មិន ប្រុងប្រយ័ត្នបែបនេះ បង្កើនហានិភ័យ នៃគ្រោះថ្នាក់ នុយក្លេអ៊ែរដ៏ធំមួយ ហើយត្រូវតែបញ្ឈប់ជាបន្ទាន់” ដោយអំពាវនាវឱ្យ “អ្នកធ្វើសេចក្តីសម្រេចចិត្តយោធា ជៀសវាងសកម្មភាពណាមួយ ដែលរំលោភលើគោលការណ៍ ជាមូលដ្ឋាន ដែលការពាររោងចក្រនុយក្លេអ៊ែរ”៕
ប្រែសម្រួល ឈូក បូរ៉ា
