យូអិន៖ ក្រុមប្រឹក្សាសន្តិសុខអង្គការសហប្រជាជាតិ បានច្រានចោលដំណោះស្រាយ ដែលស្នើឡើងដោយប្រទេសរុស្ស៊ី ស្តីពីការហាមឃាត់អាវុធទាំងអស់នៅក្នុងលំហ ដោយសហរដ្ឋអាមេរិកបានថា ទីក្រុងម៉ូស្គូ កំពុងព្យាយាមបំភាន់ពិភពលោក ពីចេតនាពិតរបស់ខ្លួន។
សមាជិកប្រាំពីរនៃក្រុមប្រឹក្សា ១៥អាសនៈ រួមទាំងប្រទេសចិនបានគាំទ្រដំណោះស្រាយនេះ ខ្វះចំនួន៩ ដែលត្រូវការសម្រាប់ការអនុម័ត។ សហរដ្ឋអាមេរិក ជប៉ុន និងប្រទេស ៥ផ្សេងទៀតបានប្រឆាំងនឹងខ្លួន ខណៈដែលប្រទេសស្វីសបានអនុប្បវាទ។
សហរដ្ឋអាមេរិកបានឲ្យដឹងថា រុស្ស៊ីបានបាញ់បង្ហោះផ្កាយរណបកាលពីថ្ងៃទី១៦ ខែឧសភា ដែលអាចជាអាវុធ ដែលអាចវាយប្រហារផ្កាយរណបផ្សេងទៀត ហើយរុស្ស៊ីបានបាញ់បង្ហោះ ផ្កាយរណបស្រដៀងគ្នា នៅឆ្នាំ២០១៩ និង២០២២។
ឯកអគ្គរដ្ឋទូតរងរបស់សហរដ្ឋអាមេរិក លោក Robert Wood បានឲ្យដឹងមុនការបោះឆ្នោតថា “យើងនៅទីនេះនៅថ្ងៃនេះ ដោយសារតែរុស្ស៊ីព្យាយាមបង្វែរ ការយកចិត្តទុកដាក់ជាសកល ពីការអភិវឌ្ឍន៍របស់ខ្លួន នៃផ្កាយរណបថ្មីដែលផ្ទុក នូវឧបករណ៍នុយក្លេអ៊ែរ”។
លោក Vasily Nebenzia ឯកអគ្គរដ្ឋទូតអង្គការសហប្រជាជាតិ របស់ប្រទេសរុស្ស៊ីបានឆ្លើយតបដោយថា “ខ្ញុំមិនបានយល់ទាំងស្រុង នូវអ្វីដែលគាត់កំពុងនិយាយអំពី ប៉ុន្តែនោះមិនមែនជាអ្វីដែលសំខាន់នោះទេ” ។
កាលពីខែមេសា សហរដ្ឋអាមេរិក និងជប៉ុន បានដាក់សេចក្តីសម្រេចមួយទៅកាន់ក្រុមប្រឹក្សា ដើម្បីបញ្ជាក់ជាថ្មីអំពីការហាមឃាត់អាវុធនុយក្លេអ៊ែរ និងអាវុធប្រល័យលោកផ្សេងទៀតនៅក្នុងលំហ។ រុស្ស៊ីបានវេតូដំណោះស្រាយនេះ ហើយបន្ទាប់មកបានឲ្យដឹងថា ខ្លួននឹងស្នើដំណោះស្រាយរបស់ខ្លួន៕
ប្រែសម្រួល ឈូក បូរ៉ា
