អាមេរិក បញ្ជូននាវាមុជទឹក ទៅក្បែរគុយបា ក្រោយនាវារុស្សី បានទៅដល់រួចទៅហើយ

បរទេស៖យោងតាមការ ចេញផ្សាយរបស់ RT នាវាមុជទឹកវាយប្រហារ របស់អាមេរិកមួយគ្រឿង បានចូលចតនៅមូលដ្ឋាន អាមេរិក នៃឈូងសមុទ្រ Guantanamo ក្នុងប្រទេសគុយបា មួយថ្ងៃបន្ទាប់ពីកងនាវារុស្ស៊ី ចំនួន4គ្រឿងបានធ្វើដំណើរ ទៅកាន់ទីក្រុង Havana ក្នុងបេសកកម្មចម្ងាយឆ្ងាយ។

នាវាមុជទឹកដែលមានឈ្មោះថា USS Helena ដែលជានាវាថ្នាក់ Los Angeles បានមកដល់កាលពីថ្ងៃព្រហស្បតិ៍សម្រាប់ ដំណើរទស្សនកិច្ចតាមកំពង់ផែ នេះបើយោងតាមបញ្ជាការដ្ឋាន ខាងត្បូង របស់សហរដ្ឋអាមេរិកSOUTHCOM បាននិយាយនៅក្នុងសេចក្តីថ្លែងការណ៍មួយ។

SOUTHCOM បានបន្ថែមថា ៖ ទីតាំង និងការដឹកជញ្ជូនរបស់នាវាត្រូវបានគ្រោងទុកពីមុនដោយកត់សម្គាល់ថា Helena កំពុងបំពេញបេសកកម្ម សន្តិសុខដែនសមុទ្រ និងការពារជាតិជាសកល។

ប្រភពដដែលបានពណ៌នាថា ការមកដល់របស់នាវាមុជទឹក គឺជាការបង្ហាញកម្លាំង ដោយរដ្ឋាភិបាលទីក្រុងវ៉ាស៊ីនតោន ក្នុងការឆ្លើយតបទៅនឹងវត្តមានរបស់កប៉ាល់រុស្ស៊ី នៅជិតឆ្នេរសមុទ្រអាមេរិក ។

គួរឲ្យដឹងដែរថាកងនាវាចរចំនួន ៤ នៃកងនាវាចរខាងជើងនៃកងទ័ពជើងទឹករុស្ស៊ី បានធ្វើដំណើរទៅកាន់ទីក្រុង Havana កាលពីថ្ងៃពុធដែលមានការ ដឹកនាំក្រុមគឺដោយនាវាចម្បាំងមីស៊ីល Admiral Gorshkov រួមជាមួយនឹងនាវាមុជទឹកដើរដោយថាមពលនុយក្លេអែរប្រភេទ Yasen-class Kazan ដែលជានាវាទំនើបបំផុតរបស់រុស្ស៊ី៕

ប្រែសម្រួល៖ស៊ុនលី