បរទេស៖ ប្រទេសវ៉េណេស៊ុយអេឡា បានចោទសហរដ្ឋអាមេរិកពីបទ “ប្លន់” និងបង្ខំប្រទេសជិតខាងឱ្យ “ក្លាយជាអ្នកសមគំនិត” បន្ទាប់ពីទីក្រុងវ៉ាស៊ីនតោនបានរឹបអូស យកយន្តហោះរបស់ប្រធានាធិបតី ម៉ាឌូរ៉ូ ។
យោងតាមសារព័ត៌មាន VN EXPRESS ចេញផ្សាយនៅថ្ងៃទី៣ ខែកញ្ញា ឆ្នាំ២០២៤ បានឱ្យដឹងថា រដ្ឋាភិបាលវេណេស៊ុយអេឡា បានបញ្ជាក់នៅក្នុងសេចក្តីថ្លែងការណ៍ កាលពីថ្ងៃទី២ ខែកញ្ញាថា “អាជ្ញាធរអាមេរិកបានរឹបអូស ដោយខុសច្បាប់នូវយន្តហោះ ដែលប្រើប្រាស់ដោយប្រធានាធិបតី វេណេស៊ុយអេឡា។ ពួកគេបានបង្ហាញពីភាពត្រឹមត្រូវ នៃសកម្មភាពរបស់ពួកគេជាមួយនឹង វិធានការបង្ខិតបង្ខំខុសច្បាប់ និងឯកតោភាគីដែលដាក់ដោយ សហរដ្ឋអាមេរិកនៅជុំវិញពិភពលោក។ មិនមានពាក្យអ្វីផ្សេងទៀត ដើម្បីពិពណ៌នាអំពីទង្វើខុសច្បាប់នេះជាង “ការប្លន់” ។
រដ្ឋាភិបាលវេណេហ្ស៊ុយអេឡា ក៏បានចោទសហរដ្ឋអាមេរិកថា បានប្រើប្រាស់អំណាចសេដ្ឋកិច្ច និងយោធារបស់ខ្លួនដើម្បីគំរាមកំហែង និងដាក់សម្ពាធលើប្រទេសមួយចំនួន ដូចជាសាធារណរដ្ឋដូមីនីក ឱ្យ “ក្លាយជាអ្នកសមគំនិត”។ សេចក្តីថ្លែងការណ៍បាននិយាយទៀតថា “នេះគឺជាឧទាហរណ៍នៃរបៀបដែល ‘សណ្តាប់ធ្នាប់ផ្អែកលើច្បាប់’ របស់សហរដ្ឋអាមេរិកមិនអើពើ នឹងបទដ្ឋានអន្តរជាតិទាំងអស់ ហើយមានគោលបំណងបង្កើត អំណាចសម្រាប់អ្នកខ្លាំងប៉ុណ្ណោះ”។
ក្រសួងយុត្តិធម៌អាមេរិកពីមុន បានប្រកាសពីការរឹបអូសយន្តហោះ “ដែលត្រូវបានទិញដោយខុសច្បាប់ក្នុងតម្លៃ ១៣ លានដុល្លារតាមរយៈក្រុមហ៊ុនជាការបាំងមុខ ហើយបានរត់ពន្ធចេញពីសហរដ្ឋអាមេរិក សម្រាប់ការប្រើប្រាស់ដោយ ប្រធានាធិបតីវេណេស៊ុយអេឡា គឺលោក នីកូឡាស់ ម៉ាឌូរ៉ូ និងអ្នកជិតស្និទ្ធនឹងគាត់” ។
សូមជម្រាបថា ក្រសួងសន្តិសុខមាតុភូមិអាមេរិក, ក្រសួងយុត្តិធម៌ និងក្រសួងពាណិជ្ជកម្ម អាមេរិក បានសម្របសម្រួលប្រតិបត្តិការមួយ ដើម្បីរឹបអូសយន្តហោះ Dassault Falcon 900 នៅសាធារណរដ្ឋដូមីនីក ហើយនាំយកវាទៅអាកាសយានដ្ឋានក្នុងរដ្ឋផ្លរីដា នៅព្រឹកថ្ងៃទី២ ខែកញ្ញា។
មន្ត្រីអាមេរិកមួយចំនួន បានប្រៀបធៀបយន្តហោះនេះ ទៅនឹងយន្តហោះ Air Force One របស់វ៉េណេស៊ុយអេឡា។ យន្តហោះដែលផលិតដោយក្រុមហ៊ុនបារាំង ហើយលាបពណ៌ខៀវ និងក្រហមនោះ បានដឹកលោក ម៉ាឌូរ៉ូ ទៅកាន់កន្លែងជាច្រើនដូចជា St. Vincent និង ប្រទេសហ្គ្រីនីដាដ ប្រទេសគុយបា និងប្រេស៊ីល៕
ប្រែសម្រួលៈ ណៃ តុលា
