តេអេរ៉ង់៖ មេដឹកនាំកំពូលរបស់អ៊ីរ៉ង់ លោក Ali Khamenei បានព្រមានថា សហរដ្ឋអាមេរិក និងសម្ព័ន្ធមិត្តនឹងទទួល “ការទះកំផ្លៀង” យ៉ាងធ្ងន់ធ្ងរ ប្រសិនបើពួកគេប្រើការគំរាមកំហែងនៅពេលដោះស្រាយជាមួយអ៊ីរ៉ង់។
លោក Khamenei បានឲ្យដឹងក្នុងអំឡុងពេលជួបជាមួយមនុស្សមកពីគ្រប់មជ្ឈដ្ឋានក្នុងប្រទេសនេះថា “ជនជាតិអាមេរិកគួរតែដឹងថា នៅពេលដោះស្រាយជាមួយអ៊ីរ៉ង់ ពួកគេមិនត្រូវប្រើការគំរាមកំហែងណាមួយឡើយ។ ពួកគេនិងអ្នកផ្សេងទៀតគួរតែដឹងថា ប្រសិនបើពួកគេចាត់វិធានការអាក្រក់ណាមួយប្រឆាំងនឹងប្រទេសអ៊ីរ៉ង់ ពួកគេនឹងទទួលការទះកំផ្លៀងយ៉ាងធ្ងន់ធ្ងរ” ។
លោកបានលើកឡើងថា ការចោទប្រកាន់របស់សហរដ្ឋអាមេរិក និងអឺរ៉ុប ដែលថាក្រុមតស៊ូនៅក្នុងតំបន់អាស៊ីខាងលិច គឺជាអ្នកតំណាងរបស់អ៊ីរ៉ង់ គឺជា “កំហុសដ៏ធំ និងជាការប្រមាថដល់ក្រុមទាំងនេះ” ដោយលោកកត់សម្គាល់ថា អ៊ីរ៉ង់មិនត្រូវការប្រូកស៊ីណាមួយឡើយ។
លោកបានអំពាវនាវឲ្យមានការប្រឆាំង និងទប់ទល់នឹងអំពើអាក្រក់របស់អ៊ីស្រាអែល តាមគ្រប់មធ្យោបាយដែលអាចធ្វើទៅបាននេះបើយោងតាមការ ចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ការកត់សម្គាល់របស់លោក Khamenei ធ្វើឡើងបន្ទាប់ពីប្រធានាធិបតីអាមេរិកលោក ដូណាល់ ត្រាំ ថ្មីៗនេះបានចោទប្រកាន់អ៊ីរ៉ង់ថា “នៅតែបញ្ជូនការផ្គត់ផ្គង់កម្រិតធំ” ដល់ក្រុមប្រដាប់អាវុធហ៊ូទី នៅក្នុងប្រទេសយេម៉ែន ហើយបានសន្យាថា នឹងធ្វើឱ្យអ៊ីរ៉ង់ “ទទួលខុសត្រូវទាំងស្រុង” សម្រាប់សកម្មភាពរបស់ក្រុមនេះ។
កាលពីសប្តាហ៍មុន ក្រុមហ៊ូទី បានឲ្យដឹងថា ខ្លួននឹងបន្តការវាយប្រហារលើកប៉ាល់អ៊ីស្រាអែល នៅសមុទ្រក្រហម សមុទ្រអារ៉ាប់ ឈូងសមុទ្រ Aden និងច្រក Bab al-Mandab រហូតដល់ច្រកចូល ហ្គាហ្សា ត្រូវបានបើកឡើងវិញ ហើយជំនួយមនុស្សធម៌ត្រូវបានអនុញ្ញាត៕
ប្រែសម្រួល ឈូក បូរ៉ា
