កំពង់ចាម៖ អភិបាលខេត្តកំពង់ចាម និងជាប្រធានគណៈកម្មការ ប្រយុទ្ធប្រឆាំងជំងឺកូវីដ-១៩ ខេត្ត លោក អ៊ុន ចាន់ដា នៅព្រឹកថ្ងៃទី ១៧ ខែមីនា ឆ្នាំ២០២១នេះ បានទទួលម៉ាសចំនួន ២៥.០០០ ម៉ាស ជាអំណោយរបស់ ក្រុមហ៊ុន ខ្មែរភូលវែលហ៊្វែឡូធើរី ខូអិលធីឌី និងថវិកាចំនួន ២លានរៀល ពីក្រុមហ៊ុន ដីឡូត៍បឹងស្នាយ ដើម្បីចូលរួមប្រយុទ្ធប្រឆាំងជំងឺកូវីដ-១៩ ។
ជាមួយគ្នានោះដែរ លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការប្រឆាំងជំងឺកូវីដ-១៩ ខេត្ត បានថ្លែងអំណរគុណចំពោះលោក-លោកស្រី ជាតំណាងក្រុមហ៊ុន ដែលបានឧបត្ថម្ភជាថវិកា និងសម្ភារៈ ដើម្បីចូលរួមក្នុងវិធានការប្រយុទ្ធ ប្រឆាំងនឹងជំងឺកូវិដ-១៩ ក្នុងខេត្តកំពង់ចាម ដែលកំពុងមានតម្រូវការចាំបាច់ សម្រាប់ប្រើប្រាស់ក្នុងប្រតិបត្តិការ ប្រយុទ្ធប្រឆាំងជំងឺកូវីដ-១៩នេះ ជាពិសេសផ្គត់ផ្គង់ដល់ប្រជាពលរដ្ឋ នៅតាមមូលដ្ឋាន និងអ្នកចំណូលស្រុកដែល កំពុងស្នាក់នៅធ្វើចត្តាឡីស័ក តាមមណ្ឌលចត្តាឡីស័ក ក្នុងខេត្តកំពង់ចាមផងដែរ ។
សូមបញ្ជាក់ថា ដើម្បីបង្ការការឆ្លងរាលដាលក្នុងសហគមន៍ ក្នុងខេត្តកំពង់ចាម លោក អ៊ុន ចាន់ដា ប្រធានគណៈកម្មការប្រយុទ្ធប្រឆាំងជំងឺកូវីដ-១៩ខេត្តកំពង់ចាម បានរៀបចំមណ្ឌលសម្រាប់អ្នកធ្វើចត្តាឡីស័ក ក្នុងក្រុងកំពង់ចាម២កន្លែង អាចទទួលអ្នកធ្វើចត្តាឡីស័កបាន ១.០០០នាក់ ។ នៅស្រុកចំការលើ បានត្រៀម ៣កន្លែង ដែលអាចទទួលអ្នកធ្វើចត្តាឡីស័ក ប្រមាណ ២៥០នាក់។នៅស្រុកព្រៃឈរ បានត្រៀម ០១កន្លែង ដែលអាចទទួលអ្នកធ្វើចត្តាឡីស័កប្រមាណ ៦០នាក់។ នៅស្រុកជើងព្រៃបានត្រៀម០១កន្លែង ដែលអាចទទួលអ្នកធ្វើចត្តាឡីស័កប្រមាណ ៨០នាក់។ នៅស្រុកបាធាយមាន០១ទីតាំង ដែលអាចទទួលអ្នកធ្វើចត្តាឡីស័កប្រមាណ ៦០នាក់។ ស្រុកកំពង់សៀម បានត្រៀម១កន្លែង ដែលអាចទទួលអ្នកធ្វើចត្តាឡីស័កប្រមាណ ៥០នាក់។ ស្រុកកងមាស បានត្រៀម ០២កន្លែង ដែលអាចទទួលអ្នកធ្វើចត្តាឡីស័ក ប្រមាណ ៧០នាក់។ ស្រុកស្រីសន្ធរ បានត្រៀម ០១កន្លែង ដែលអាចទទួលអ្នកធ្វើចត្តាឡីស័កប្រមាណ ២០នាក់។ ស្រុកកោះសូទិន បានត្រៀម ០២កន្លែង ដែលអាចទទួលអ្នកធ្វើចត្តាឡីស័កប្រមាណ ៣០នាក់។ និងស្រុកស្ទឹងត្រង់ បានត្រៀម ០១កន្លែង ដែលអាចទទួលអ្នកធ្វើចត្តាឡីស័កប្រមាណ ២០នាក់ផងដែរ។
