ភ្នំពេញ ៖ លោក បាន លឹម អគ្គនាយករង ធនាគារអេអឌីប៊ី (ARDB Bank) តំណាងដ៏ខ្ពង់ខ្ពស់ លោក កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយក ធនាគារអភិវឌ្ឍន៍ជនបទ និងកសិកម្ម និងតំណាង សមាគមខ្មែរហាមិលតុន-ភ្នំពេញ និងសហការី នៅថ្ងៃទី១ ខែមេសា ឆ្នាំ២០២១ បានចុះសួរសុខទុក្ខ សំណេះសំណាល ជាមួយក្មួយៗកុមារកំព្រា ក្នុង “កម្មវិធីសប្បុរសធម៌ របស់ឯកឧត្តម កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារ អេ អ ឌី ប៊ី និង សមាគមខ្មែរហាមិលតុន-ភ្នំពេញ ដើម្បីជួយឧបត្ថម្ភ ដល់អង្គការពន្លឺអនាគត” នៅមណ្ឌល នៃអង្គការពន្លឺអនាគត ដែលមានទីតាំង ស្ថិតនៅភូមិព្រៃល្វា សង្កាត់ចោមចៅ ខ័ណ្ឌពោធិ៍សែនជ័យ រាជធានីភ្នំពេញ ។
អង្គការពន្លឺអនាគត បានបង្កើតឡើងនៅឆ្នាំ១៩៩៥ ដើម្បីជួយលើកកម្ពស់ ជីវភាពរស់នៅ ផ្តល់ចំណីអាហារ ស្នាក់នៅ សំលៀកបំពាក់ សុខមាលភាព អប់រំបណ្តុះបណ្តាលវិជ្ជាជីវៈ និងបញ្រ្ជៀបការយល់ដឹង អំពីវប្បធម៌ និងសង្គម ដល់កុមារកំព្រា ដែលគ្មានទីពឹង។ បច្ចុប្បន្ន អង្គការពន្លឺអនាគតបាន និងកំពុងចិញ្ចឹមបីបាច់ កុមារកំព្រា ចំនួន ៦៦នាក់ ក្នុងនោះកុមារីចំនួន ៣៩នាក់ ដែលមានអាយុ ចាប់ពី៥ឆ្នាំ ដល់២១ឆ្នាំ និងបណ្តុះបណ្តាល អប់រំចាប់ពីថ្នាក់បឋមសិក្សា រហូតដល់មហាវិទ្យាល័យ។
ក្នុងឱកាសនោះដែរលោក បាន លឹម ក៏បានពាំនាំបណ្តាំ សាកសួរសុខទុក្ខ និងការនឹងរលឹក ពីសំណាក់លោក កៅ ថាច ជម្រាបជូនដល់ក្មួយៗ កុមារ កំព្រាទាំងអស់ និងគណៈគ្រប់គ្រង ដែលលោក និងសមាគមខ្មែរហាមិលតុន-ភ្នំពេញ តែងគិតគូរយកចិត្តទុក្ខដាក់ជានិច្ច ចំពោះជីវភាពរស់នៅ និងបន្តការឧបត្ថម្ភគាំទ្រ ដល់ក្មួយៗកុមារកំព្រា នៅក្នុងមណ្ឌល នៃអង្គការពន្លឺអនាគត នេះជាដរាប។
លោក បាន លឹម ក៏បានផ្តាំផ្ញើដល់ក្មួយៗ ឱ្យខិតខំរៀនសូត្រ ឱ្យបានពូកែ មានចំណេះដឹងជ្រៅជ្រះ ដើម្បីអនាគតភ្លឺស្វាង និងណែនាំដល់ក្មួយៗ ឱ្យអនុវត្តអនាម័យ ស្អាតជានិច្ច ដើម្បីចៀសផុត ពីជំងឺកូវីដ-១៩ ដោយអនុវត្តតាម អនុសាសន៍ណែនាំដ៏ខ្ពស់ខ្ពស់ របស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា គឺ “៣កុំ និង៣ការពារ”។
ជាមួយគ្នានោះដែរ លោក បាន លឹម តំណាងឲ្យលោក កៅ ថាច បានប្រគល់នូវអំណោយ សប្បុរសធម៌ របស់លោក កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយក ធនាគារ អេ អ ឌី ប៊ី និងសមាគមខ្មែរ ហាមិលតុន-ភ្នំពេញ ដើម្បីជួយឧបត្ថម្ភ ដល់អង្គការពន្លឺអនាគត” នាពេលនេះ រួមមាន ថវិកា, អង្ករ២តោន និងគ្រឿងឧបភោគ បរិភោគមួយចំនួនទៀត ដូចជា មី ទឹកត្រី និងទឹកស៊ីអ៊ីវ ។
ជាកិច្ចតបស្នងចំពោះទឹកចិត្ត សប្បុរសធម៌របស់លោក កៅ ថាច និងសមាគមខ្មែរ ហាមិលតុន-ភ្នំពេញ លោក នួន សុថេរ៉ូ ប្រធានអង្គការពន្លឺអនាគត បានថ្លែងនូវអំណរគុណ យ៉ាងជ្រាលជ្រៅ ចំពោះលោក កៅ ថាច និងសមាគមខ្មែរ ហាមិលតុន-ភ្នំពេញ ដែលតែងជួយឧបត្ថម្ភគាំទ្រ ជានិច្ចចំពោះអង្គការពន្លឺអនាគត ក្នុងការចិញ្ចឹមបីបាច់ ក្មួយៗកុមារកំព្រា ដែលបច្ចុប្បន្ន ដោយសាវិបត្តិនៃជំងឺកូវីដ-១៩ ឆ្លងរាលដាល ចូលសហគមន៍ខ្លាំង អង្គការត្រូវបិទទ្វារ ធ្វើឱ្យជួបបញ្ហាខ្វះខាតស្បៀង ដូចជាអង្ករជាដើម ហើយក្នុងពេលនេះ លោកមានសេចក្តី សប្បាយរីករាយជាខ្លាំង ដោយទទួលបានស្បៀង ទាន់ពេលសម្រាប់ក្មួយៗ មានអាហារហូបចុក គ្រប់គ្រាន់ប្រចាំថ្ងៃជាបន្ត៕
