ព័ត៌មានជាតិ

ទេសរដ្ឋមន្ត្រី ចម ប្រសិទ្ធ កោតសរសើរ អាជ្ញាធររាជធានី ចំពោះការខិតខំប្រឹងប្រែង ក្នុងការទប់ស្កាត់ ការរីករាលដាល ជំងឺកូវីដ-១៩

ភ្នំពេញ៖ លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងការកោតសរសើរយ៉ាងខ្លាំង ចំពោះលោក ឃួង ស្រេង អភិបាលរាជធានីភ្នំពេញ ដែលបានខិតខំប្រឹងប្រែង ទាំងថ្ងៃនិងយប់ ក្នុងសកម្មភាពទប់ស្កាត់ ការរីករាលដាល ជំងឺកូវីដ-១៩ ដើម្បីសុខមាលភាព ប្រជាពលរដ្ឋ និងសង្គមជាតិទាំងមូល ពោលគឺធ្វើយ៉ាងណា អោយរាជធានីភ្នំពេញ វិលទៅរកប្រក្រតីភាព ជាធម្មតាឡើងវិញ។

ក្នុងឱកាស នាំយក ថវិកា និងស្បៀងអាហារជាច្រើនមុខ ជូនរដ្ឋបាលរាជធានីភ្នំពេញ ដើម្បីជួយសម្រួលជីវភាពប្រជាពលរដ្ឋ និងចាត់វិធានការទប់ស្កាត់ ការរីករាលដាល មេរោគកូវីដ-១៩ នៅសាលារាជធានីភ្នំពេញ នៅព្រឹកថ្ងៃទី២៤ ខែឧសភា ឆ្នាំ២០២១នេះ លោកចម ប្រសិទ្ធ មានប្រសាសន៍ថា ដើម្បីសុខមាលភាព ប្រជាពលរដ្ឋ និងសង្គមជាតិទាំងមូល លោក ឃួង ស្រេង អភិបាលរាជធានីភ្នំពេញ បានខិតខំប្រឹងប្រែងណាស់ ដោយមិនបានគិតថា ថ្ងៃឬយប់ឡើយ ធ្វើយ៉ាងណាទប់ស្កាត់អោយបាន នូវការរីករាលដាល មេរោគកូវីដ-១៩ ។

លោកទេសរដ្ឋមន្ត្រី ក៏បានលើកឡើងដែរថា ស្ថានភាពកូវីដ-១៩ នៅភ្នំពេញមិនទាន់មានភាព ល្អប្រសើរនូវឡើយទេ ព្រោះនៅមានតំបន់លឿងទុំ នៅឡើយ ប៉ុន្តែទោះបីជាយ៉ាងណាក្តី ដើម្បីស្តារសេដ្ឋកិច្ចជាតិឡើងវិញ យើងត្រូវតែបើកអោយការ ធ្វើចរាចរណ៍ឡើងវិញ ជាមួយនិងការជំរុញ ឱ្យអនុវត្តនូវវិធានការការពារ របស់ក្រសួងសុខាភិបាល និងការអនុវត្ត៣កុំនិង៣ការពារ របស់សម្តេចតេជោ។

ក្នុងនោះ លោក ឃួង ស្រេង អភិបាលរាជធានីភ្នំពេញ ក៏បានថ្លែងអំណរគុណ យ៉ាងជ្រាលជ្រៅ ចំពោះលោកកិត្តិសេដ្ឋាបណ្ឌិត ក្នុងនាមក្រុមប្រឹក្សា គណៈអភិបាលរាជធានីភ្នំពេញ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទាំងអស់ នៅរាជធានីភ្នំពេញ ដែលបានឧបត្ថម្ភ៖ ១- ថវិកា ចំនួនៈ ១២១,៦៩៤,០០០រៀល, ២- សាប៊ូ ចំនួនៈ ៣០០កញ្ចប់,៣- ទឹកត្រី និងទឹកស៊ីម៉ីច ចំនួនៈ ៦,០០០ដប ,៤- ទឹកបរិសុទ្ធហាយធិច ចំនួន ២០០កេស, ៥- ពងមាន់ ចំនួនៈ ២,០០០គ្រាប់, ៦ – សាច់មាន់ចំនួន ១០០ក្បាល,៧- សាច់កែច្នៃចំនួន ១០០គីឡូក្រាម ,៨- សាច់ក្រក ចំនូនៈ ៥០កញ្ចប់,៩- មាន់អាំង ចំនួនៈ ៥០កញ្ចប់ ជូនរដ្ឋបាលរាជធានីភ្នំពេញ ដើម្បីជួយដល់ជីវភាព ប្រជាពលរដ្ឋ និងចាត់វិធានការទប់ស្កាត់ ការរីករាលដាល មេរោគកូវីដ-១៩នេះ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top