ព័ត៌មានជាតិ

អភិបាលរាជធានីភ្នំពេញ ប្រកាសគាំទ្រ សម្តេចតេជោ ក្នុងការធ្វើវិសោធនកម្ម រដ្ឋធម្មនុញ្ញ និងច្បាប់ កំណត់ឱ្យថ្នាក់ដឹកនាំកំពូលៗ របស់ជាតិ ត្រូវមានសញ្ជាតិខ្មែរតែមួយ

ភ្នំពេញ៖ លោកឃួង​ ស្រេង អភិបាលរាជធានីភ្នំពេញ​ និងសមាជិកសមាជិការក្រុមប្រឹក្សារាជធានីគណៈអភិបាលរាជធានីថ្នាក់ដឹកនាំគ្រប់លំដាប់ថ្នាក់មន្ត្រីរាជការកងកម្លាំងប្រដាប់អាវុធ​គ្រប់ប្រភេទព្រមទាំងប្រជាពលរដ្ឋទាំងអស់ក្នុងរាជធានីភ្នំពេញប្រកាសគាំទ្រយ៉ាងពេញទំហឹង ចំពោះអនុសាសន៍ដ៏ខ្ពង់ខ្ពស់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការធ្វើវិសោធនកម្មរដ្ឋធម្មនុញ្ញ និងច្បាប់ពាក់ព័ន្ធ ដើម្បីកំណត់ឱ្យថ្នាក់ដឹកនាំកំពូលៗរបស់ជាតិ ដែលកាន់តួនាទី ជាប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញ ត្រូវមានសញ្ជាតិខ្មែរតែមួយ។

ការមានសញ្ជាតិខ្មែរតែមួយ សម្រាប់ថ្នាក់ដឹកនាំកំពូលៗ របស់ជាតិនាពេលនេះ គឺជាអ្នកទទួលខុសត្រូវលើជោគវាសនា និងផលប្រយោជន៍ជាតិខ្មែរ ត្រូវហ៊ានលះបង់អ្វីៗគ្រប់បែបយ៉ាងទាំងអស់ ដើម្បីបុព្វហេតុជាតិ និងប្រជាជនខ្មែរ ព្រមទាំងបង្ហាញពីភាពស្មោះត្រង់ចំពោះជាតិ បញ្ចៀសពីការជ្រៀតជ្រែករបស់បរទេស ។

អនុសាសន៍ផ្តួចផ្តើមដ៏ខ្ពង់ខ្ពស់បំផុត របស់សម្តេចតេជោនាយករដ្ឋមន្ត្រី គឺជាការតម្រង់ទិសបន្ថែមជូនបងប្អូនប្រជាពលរដ្ឋទាំងក្នុងពេលបច្ចុប្បន្ន និងទៅអនាគត ដើម្បីបន្តជ្រើសរើសថថ្នាក់ដឹកនាំជាតិ ប្រកបដោយគុណវុឌ្ឍិផ្អែក ចំណេះដឹង បទពិសោធន៍ ទេពកោសល្យ ភាពឈ្លាសវៃ ប៉ិនប្រសប់ គតិបណ្ឌិត ភាពចាស់ទុំលើយុទ្ធសាស្ត្រដឹកនាំ និងតែងតែរួមសុខរួមទុក្ខ ជាមួយបងប្អូនប្រជាពលរដ្ឋ នៅគ្រប់ដំណាក់កាលទាំងអស់ គិតចាប់ពីដំណាក់កាលរំដោះជាតិមាតុភូមិ ចេញពីរបបប្រល័យពូជសាសន៍​ ប៉ុលពត ដំណាក់កាលស្តារ នឹងកសាងប្រទេសជាតិពីបាតដៃទទេ ឲ្យមានការអភិវឌ្ឍលើគ្រប់វិស័យ ព្រមទាំងការខិតខំដោះស្រាយបញ្ហាប្រឈមជាសកល នៃការរីករាលដាលជំងឺកូវីដ១៩ បានល្អប្រសើរ ដូចពេលបច្ចុប្បន្ន ។ ទទឹមនឹងនេះ ការរៀបចំធ្វើវិសោធនកម្មកំណត់ឲ្យមានសញ្ជាតិខ្មែរតែមួយ  ចំពោះជាតិ និងប្រជាជន ជាពិសេសដើម្បីបញ្ជៀសបាននូវការជ្រៀតជ្រែកពីសំណាក់បរទេស ដូចក្នុងពេលអតីតកាល ដែលអ្នកនយោបាយខ្មែរមួយក្តាប់តូចមានសញ្ជាតិពីរ ឬសញ្ញាតិច្រើន តែងតែពឹងពាក់បរទេស ដើម្បីដាក់សម្ពាធ​ ឬធ្វើទុក្ខបុកម្នេញមកលើជាតិសាសន៍ និងប្រជាជនខ្លួនឯង ដោយមិនបានគិតគូរ ពីផលប្រយោជន៍ និងសុខទុក្ខរបស់ប្រជាជនឡើយ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×