ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងចេញពីទឹកដីសហរដ្ឋអាមេរិកមកថា លោក ចូ បៃឌិន ប្រធានាធិបតីសហរដ្ឋអាមេរិក អាចនឹងមានលទ្ធភាពមកកម្ពុជា នៅចុងឆ្នាំនេះ ដោយសារកម្ពុជាធ្វើជាប្រធានអាស៊ាន។
សម្តេចតេជោ បានថ្លែងក្នុងពិធីជួបសំណេះសំណាល ជាមួយសហគមន៍ខ្មែរនៅអាមេរិក នាយប់ថ្ងៃ១២ ឧសភាថា «ខ្ញុំមកអាមេរិកនេះ មិនមែនតំណាងត្រឹមតែ គ្រួសារត្រកូលហ៊ុននោះទេ តែតំណាងឲ្យកម្ពុជា ។ ពេលដែលចុះពីយន្តហោះកងទ័ពអាមេរិក ត្រូវកាន់ទង់ជាតិពីរ គឺទង់អាមេរិកមួយ និងកម្ពុជាមួយ។ ចំណុចនេះ ត្រូវយល់ឲ្យច្បាស់ ព្រោះថា បើខ្ញុំមកឯកជន អាមេរិកមិនដាក់អង្គរក្សការពារអីចឹងទេ! បើខ្ញុំទៅអង្គការសហប្រជាជាតិ ក៏អាមេរិកទទួលបន្ទុកការពារ ដែរហើយមែនជារឿង… ពីព្រោះអាមេរិកក៏ខ្លាចសុវត្ថិភាពរបស់ភ្លៀវបរទេស ដែលមកស្នាក់នៅអាមេរិក»។
សម្តេចក៏បានលើកឡើងថា នៅពេលអតីតប្រធានាធិបតីអាមេរិក លោក បារ៉ាក់ អូប៉ាម៉ា មកស្រុកខ្មែរកន្លងមក សម្តេចក៏បានរៀបចំវិធានការការពារផងដែរ។ នាយករដ្ឋមន្ត្រីជប៉ុន នាយករដ្ឋមន្ត្រីចិន កូរ៉េ ឥណ្ឌា អូស្រាលី…ការពារទាំងអស់។
សម្តេចលើកឡើងថា «ចុងឆ្នាំនេះ កម្ពុជាធ្វើជាប្រធានអាស៊ាន ហើយនឹងមានជំនួបអាស៊ាន-អាមេរិក ធម្មតា ។ នេះជាខួបលើកទី៤៥ ដែលជំនួបពិសេស ហើយឆ្នាំនេះ អាចជាលទ្ធភាពប្រធានាធិបតី ចូ បៃឌិនទៅកម្ពុជា»។
សម្តេចថា កាលពីកម្ពុជាធ្វើម្ចាស់ផ្ទះ នៃកិច្ចប្រជុំអាស៊ានឆ្នាំ២០១២ លោក អូប៉ាម៉ា អតីតប្រធានាធិបតីអាមេរិកក៏បានមកដែរ ៕
