ភ្នំពេញ៖ ក្នុងពេលរដ្ឋសភា កំពុងដំណើរពិភាក្សា អនុម័តលើវិសោធនកម្ម រដ្ឋធម្មនុញ្ញលើកទី១០ នៅព្រឹកថ្ងៃទី២៨ ខែកក្កដា ឆ្នាំ២០២២នេះ រដ្ឋមន្ត្រីក្រសួងយុត្តិធម៌ លោក កើត រិទ្ធ បានឡើងមកការពារ នូវមាត្រាទាំង៨ នៃរដ្ឋធម្មនុញ្ញ ។
ដោយបានគូសបញ្ជាក់ ទៅកាន់គណបក្សនយោបាយ និងអង្គការសង្គមស៊ីវិលមួយចំនួន ដែលបានដាក់ញត្តិប្រឆាំង ការធ្វើវិសោធនកម្មរដ្ឋធម្មនុញ្ញថា គ្រាន់តែជាការបំពងសំឡេង របស់ក្រុមប្រឆាំងមួយតូច ឬគ្រាន់តែជាការលើកឡើង របស់គណបក្សនយោបាយ ដែលប្រឆាំង នឹងរាជរដ្ឋាភិបាលប៉ុណ្ណោះ ។
គណបក្សនយោបាយ៤ ដាក់ញត្តិនៅសភាកន្លងមក បានអះអាងថា ការធ្វើវិសោធនកម្មច្បាប់ធម្មនុញ្ញនេះ ជាការធ្វើឲ្យខាតបង់ប្រយោជន៍ជាតិ និងប៉ះពាល់ដល់ការស្វែងរកយុត្តិធម៌ ជូនម្ចាស់ឆ្នោត ដោយការជ្រើសរើសនាយករដ្ឋមន្រ្តី មិនបានឆ្លងសភា គឺដាក់ថ្វាយព្រះមហាក្សត្រ ក្នុងការចាត់តាំងនាយករដ្ឋមន្រ្តីតែម្តង។
ក្នុងសម័យប្រជុំពេញអង្គរដ្ឋសភា នីតិកាលទី៦ សម័យប្រជុំទី៧ នាព្រឹកថ្ងៃទី២៨ ខែកក្កដា ឆ្នាំ២០២២ លើការអនុម័តវិសោធនកម្មរដ្ឋធម្មនុញ្ញ លើកទី១០ លោក កើត រិទ្ធបានមានប្រសាសន៍ថា ការលើកឡើង ក្នុងញត្តិរបស់គណបក្សនយោបាយចំនួន៤ ដាក់មករដ្ឋសភាប្រឆាំង វិសោធនកម្មរដ្ឋធម្មនុញ្ញនោះ គឺមិនយល់ដឹងស៊ីជម្រៅ ចំពោះខ្លឹមសារសេចក្តីព្រាងច្បាប់នោះទេ។
លោកបញ្ជាក់ថា «ការលើកឡើងក្នុងញត្តិ ដែលដាក់ជូនរដ្ឋសភា គឺការមិនត្រឹមត្រូវ និងដោយមិនយល់ដឹងច្បាស់លាស់ ទាំងលើខ្លឹមសារពិតប្រាកដ ចំពោះវិសោធនកម្មច្បាប់ លើកទី១០នេះ ទាំងលើប្រព័ន្ធដឹកនាំប្រទេស ទាំងសភានិយម»។
លោកថា ការលើកឡើងរបស់គណបក្សនយោបាយ ទាំង៤ មិនត្រឹមត្រូវនិងជាការបំភ្លៃខុសពីខ្លឹមសារពិត ប្រាកដនៃមាត្រា១១៩ថ្មី(ពីរ) ដែលជាកម្មវត្ថុ នៃការធ្វើវិសោធនកម្មច្បាប់ធម្មនុញ្ញ។ លោកបន្តថា ការលើកឡើង របស់គណបក្សនយោបាយ ជាស្ថាប័នក្រៅសភាជាតិ ជាការលើកឡើង ដោយមិនយល់ច្បាស់ អំពីដំណើរការប្រជាធិបតេ្យសេរីពហុបក្ស និងដំណើរការរដ្ឋសភា តាមរបបដំណើការសភានិយម ដែលកំពុងអនុវត្តនៅកម្ពុជា នាពេលបច្ចុប្បន្ន។
សូមជម្រាបថា កាលពីថ្ងៃ២១ កក្កដា គណបក្សនយោបាយចំនួន៤ នៅក្រៅរដ្ឋាភិបាល គឺគណបក្សភ្លើងទៀន គណបក្សឆន្ទៈខ្មែរ គណបក្សកែទម្រង់កម្ពុជា និងគណបក្សប្រជាធិបតេយ្យមូលដ្ឋាន បានរួមគ្នាដាក់ញត្តិមួយច្បាប់ ជូនសភា ដើម្បីស្នើកុំឲ្យអនុម័ត វិសោធនកម្មរដ្ឋធម្មនុញ្ញ លើកទី១០ ។ ក្នុងញត្តិបានលើកឡើងថា ការធ្វើវិសោធនកម្មនេះ ប៉ះពាល់ដល់របបសភានិយម ដោយបន្ថយអំណាចសភាជាតិ ឬរំលងសភាជាតិ ដោយតែងតាំងនាយករដ្ឋមន្ត្រី ផ្តល់សិទ្ធិអំណាចដល់គណបក្សនយោបាយ ដែលជាស្ថាប័នក្រៅសភាជាតិ ធ្វើសេចក្តីស្នើដោយផ្ទាល់ ដើម្បីស្នើថ្វាយព្រះមហាក្សត្រ ចាត់តាំងវិរៈជនមួយរូបជានាយករដ្ឋមន្ត្រី។
បើតាមរដ្ឋមន្ត្រីយុត្តិធម៌ ការធ្វើវិសោធនកម្មច្បាប់ រដ្ឋធម្មនុញ្ញលើកទី១០នេះ ក៏ដូចជាការធ្វើវិសោធនកម្ម លើក៩កន្លងមក គឺដើម្បីការពារឧត្តមប្រយោជន៍របស់ជាតិ ជាពិសេសបំពេញចន្លោះខ្វះខាត របស់រដ្ឋធម្មនុញ្ញ និងជួយឲ្យស្ថាប័នរដ្ឋ ដំណើការប្រព្រឹត្តិទៅដោយរលូនមិនជាប់គាំង និងនិរន្តភាពនៅគ្រប់កាលៈទេសៈទាំងអស់ ៕
