កំពង់ចាម ៖ នៅក្នុងកិច្ចប្រជុំដើម្បីពន្លឿនការងារចុះបញ្ជីដីធ្លី មានលក្ខណៈជាប្រព័ន្ធ នៅព្រឹកថ្ងៃទី ២៩ ខែមីនា ឆ្នាំ ២០២៣ នៅសាលាខេត្តកំពង់ចាម អភិបាលខេត្ត លោក អ៊ុន ចាន់ដា បាន ណែនាំឲ្យមន្ត្រី នៃមន្ទីរដែនដីនគររូបនីយកម្ម សហការគ្នាដើម្បីធ្វើការងារចុះបញ្ជីដីធ្លី ជូនប្រជាពលរដ្ឋ ឲ្យបានឆាប់រហ័ស ទៅតាមផែនការកំណត់ ។
លោក អ៊ុន ចាន់ដា បានថ្លែងថា ការងារដីធ្លី គឺជាការងារសំខាន់បំផុតដែលបានកំណត់ក្នុងយុទ្ធសាស្ត្រចតុកោណដំណាក់ទី៤ របស់រដ្ឋាភិបាល ការគ្រប់គ្រងដី ការប្រើប្រាស់ ការបែងចែកដី និងការដោះស្រាយវិវាទដីធ្លី គឺជាកិច្ចការអាទិភាពមួយដែល អាជ្ញាធរខេត្ត យកចិត្តទុកដាក់បំផុត ។
ដើម្បីពន្លឿនការងារចុះបញ្ជីដីធ្លីមានលក្ខណៈជាប្រព័ន្ធ លោកអភិបាលខេត្ត បានផ្ដល់នូវអនុសាសន៍មួយចំនួនដូចខាងក្រោម ៖
ទី១ ៖ លើការងារចុះបញ្ជីដីធ្លីមានលក្ខណៈជាប្រព័ន្ធ ជូនបងប្អូនប្រជាពលរដ្ឋ ដែលនៅសេសសល់ទូទាំងខេត្ត ពិនិត្យជារួមកន្លងមកសង្កេតឃើញថា ការងារនេះហាក់មាន សន្ទុះខ្លាំងក្លា មានការគាំទ្រ និងការចូលរួមពីគ្រប់ មជ្ឈដ្ឋាន ពិសេសប្រជាពលរដ្ឋ ដែលបង្កលក្ខណៈឲ្យកិច្ចការងារនេះ ដំណើរការទៅដោយរលូន និងឈានតាមផែនការដែលបានកំណត់ ។ យោងតាមបទពិសោធន៍ល្អៗកន្លងមក ខ្ញុំស្នើអោយលោក លោកស្រី អ្នកនាងកញ្ញដែលបានចូលរួមអនុវត្តនូវការងារនេះ បន្តស្នាដៃអោយបានសម្រេចនៅផែនការ ដែលបានដាក់ចុះ ត្រូវខិតខំសហការជាមួយអាជ្ញាធរមូលដ្ឋាន ក្នុងការបំផុសប្រមូលផ្ដុំប្រជាពលរដ្ឋអោយមានជំនឿ និងចូលរួមក្នុងសកម្មភាពការងារ អោយបានខ្លាំងក្លា ។
ទី២ ៖ អភិបាលនៃគណៈអភិបាលស្រុក ត្រូវបង្កលក្ខណៈដល់មន្ត្រីដែលអនុវត្ត បានទៅបំពេញការងារចុះបញ្ជីដីធ្លីមានលក្ខណៈជាប្រព័ន្ធ។
ទី៣ ៖ អភិបាលនៃគណៈអភិបាលស្រុក ត្រូវសហការណ៍ជាមួយលោកមេឃុំ ប្រធានវាលដើម្បីជ្រើសរើស យកឃុំ ដែលមានលក្ខណៈងាយស្រួល និងមានទីផ្សាដីធ្លី អនុវត្តមុនដើម្បីប្រមូលទិន្នន័យបានលឿន និងចេញប័ណ្ណបានច្រើន ម្យ៉ាងទៀតបើតំបន់នោះមានទីផ្សាដីធ្លី យើងអាចប្រមូលពន្ធពីការលក់ទិញ ចូលថវិកាជាតិ ។
ទី៤ ៖ អភិបាលនៃគណៈអភិបាលស្រុក ត្រូវពិនិត្យតាមដាន ការងាររបស់មន្ត្រីចុះបញ្ជីដីធ្លីមានលក្ខណៈជាប្រព័ន្ធដោយសហការណ៍ជាមួយ ចូលរួមដោះស្រាយអោយទាន់ពេលវេលា នៅពេលមានបញ្ហាកើតឡើងក្នុងតំបន់វិនិច្ឆ័យ ។
ទី៥ ៖ មន្ទីរ អង្គភាពពាក់ព័ន្ធនានា ត្រូវចូលរួមកំណត់ព្រំប្រទល់អោយបានឆាប់រហ័ស ដូចជាការកំណត់ដីអាងទឹកប្រឡាយ បឹង ឡូត៍នេសាទ ។ល។
ទី៦ ៖ លោកមេឃុំត្រូវជំរុញអោយលោកមេភូមិ អនុភូមិ ចាស់ព្រឹទ្ធាចារ្យក្នុងភូមិជួយប្រមូលប្រជាពលរដ្ឋ មកចូលរួមកំណត់ព្រំ វាស់វែង និងវិនិច្ឆ័យ។
ទី៧ ៖ ការងារដោះស្រាយវិវាទដីធ្លី បញ្ហាវិវាទដីធ្លីនៅទូទាំងខេត្តកំពង់ចាម យើងសូមអោយ អាជ្ញាធរគ្រប់លំដាប់ថ្នាក់ មន្ទីរជំនាញ ចូលរួមអនុវត្ត និងជំរុញការដោះស្រាយ វិវាទនេះអោយមានការថយចុះ ជាលំដាប់ ។ ដូចនេះទំនាស់ដែលនៅសេសសល់ទាំងប៉ុន្មាន នៅពេលបិទផ្សាយទិន្នន័យ ជាសាធារណៈ ស្នើសុំអោយគណៈកម្មការរដ្ឋបាលពន្លឿនការងារ ដោះស្រាយអោយបានឆាប់ ដើម្បីបូកសរុប របាយការណ៍រដ្ឋបាល សម្រាប់ចេញប័ណ្ណកម្មសិទ្ធិជូនប្រជាពលរដ្ឋរ ការងារដោះស្រាយវិវាទនេះដោយយកតាមរយៈយន្តការដោះស្រាយវិវាទដីធ្លីដែលមានស្រាប់ ចុះធ្វើការស្រាវជ្រាវ និងដោះស្រាយតាមគោលនយោបាយឈ្នះ-ឈ្នះ សំដៅបង្កើនសុខដុមរម្យនីយកម្មក្នុងសង្គម ។
ទី៨ ៖ ការងារបម្រើសេវាសាធារណៈ
អង្គភាពច្រកចេញ-ចូលតែមួយរដ្ឋបាល ខេត្តកំពង់ចាម ការពង្រឹងការអនុវត្តនូវតារាងកម្រៃសេវា និងរយៈពេលនិមួយៗ ការផ្តល់សេវា ជូនប្រជាពលរដ្ឋនៅក្នុងខេត្ត ក៏ត្រូវបានលើកកំពស់ តាមរយៈការពង្រឹងការផ្តល់សេវាតាមដែលបានកំណត់ រួមទាំងការពង្រឹងវិន័យការងារ ចំពោះមន្ត្រីសាធារណៈ សំដៅរួមគ្នាលើកកំពស់ប្រសិទ្ធិភាព គណនេយ្យភាព តម្លាភាព និងសុច្ចរិតភាព ក្នុងការផ្តល់សេវាជូនប្រជាពលរដ្ឋ ។
ទី៩ ៖ ត្រូវបង្កើនសាមគ្គីផ្ទៃក្នុងអង្គភាព ត្រូវលើកកំពស់យុត្តិធម៌ និងសមធម៌ ដោយមិនមានការរើសអើង ការប្រកាន់បក្ខពួក ឋានៈនិងនិន្នាការនយោបាយ ៕
