ភ្នំពេញ៖ លោកបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុក ជាអគ្គនាយក នៃធនាគារអភិវឌ្ឍន៍ជនបទ និងកសិកម្ម បានបង្ហាញពីបំណងចង់ បងប្អូនប្រជាកសិករ មានការគិត និងកែប្រែទម្លាប់ ដើម្បីកែប្រែខ្លួនទៅជាកសិករទំនើប ឬសហក្រិន វិស័យឌីជីថល ក្នុងវិស័យកសិកម្ម ។
ក្នុងឱកាសបន្តអញ្ជើញ ចុះសំណេះសំណាល សួរសុខទុក្ខ និងផ្សព្វផ្សាយអំពីគោលការណ៍ឥណទានគាំទ្រ ដល់ខ្សែច្រវាក់ផលិតកម្ម ដាំដុះស្វាយចន្ទី នៅស្រុកគាស់ក្រឡ ខេត្តបាត់ដំបង នាថ្ងៃទី២៤ ខែមិថុនា ឆ្នាំ២០២៣ លោកបណ្ឌិត កៅ ថាច បានធ្វើការបង្ហាញ អំពីវត្ថុបំណង ចង់អោយបងប្អូនកែប្រែខ្លួន ទៅជាកសិករទំនើប ឬសហក្រិនវិស័យឌីជីថល ក្នុងវិស័យកសិកម្ម គឺ៖ ១.រៀបចំផែនការដាំដុះ ថែទាំ និងប្រមូលផល, ២.គិតពីប្រាក់ចំណេញ, ៣.សិក្សាបញ្ហាប្រឈម, ៤.គិតពីការកាត់បន្ថយចំណាយ និង៥.ការផ្គត់ផ្គង់ទីផ្សារ និងតភ្ជាប់ទីផ្សារ ។
លោកបណ្ឌិត បញ្ជាក់ថា ដើម្បីសម្រេចកម្មវត្ថុទាំង ៥ ខាងលើនេះ លោកចង់ឲ្យបងប្អូនប្រជា ប្រជាកសិករ ចាំបាច់ត្រូវរៀបចំផែនការដាំដុះ ឲ្យបានច្បាស់លាស់ ថាតើគួរដាំដុះដំណាំអ្វី ហើយគូរដាំនៅពេលណា? ដាំដំណាំអ្វីខ្លះដែលទីផ្សារត្រូវការ គួរថែទាំរបៀបណា នៃការសំអាតស្មៅ ដាក់ជី ដាក់ទឹក បាញ់ថ្នាំ តែងដើម-មែក ឬបងប្អូនអាចកែប្រែដីណាមួយកុំទុកដីទំនេរចោល គួររកដំណាំប្រភេទណា ដែលអាចអោយយើងដាំដុះរយៈពេលខ្លី ប៉ុន្តែមានទីផ្សារ និងមានតម្រូវការ ។ មួយទៀត បងប្អូនត្រូវចេះកត់ត្រាចំណូល ចំណាយអោយបានច្បាស់លាស់ និង ស្វែងរកការចុះកិច្ចសន្យា កសិកម្ម ដើម្បីធានាស្ថេរភាពទីផ្សារ និងតំលៃ ជាដើម។ ល។
ស្របពេលជាមួយគ្នានេះ លោកបណ្ឌិត បានអនុញ្ញាតអោយបងប្អូនប្រជាកសិករ ឡើងបញ្ចេញមតិ និងទស្សនៈផ្សេងៗជុំវិញ បញ្ហាវិស័យកសិកម្ម ដែលបងប្អូនកំពុងប្រឈម និងកំពុងជួបផលវិបាក និងជាពិសេសពាក់ព័ន្ធនឹងស្វាយចន្ទី ។ លោកបណ្ឌិត ក៏បានអនុញ្ញាតបងប្អូន ដាំដុះស្វាយចន្ទី លើកជាសំណើរ និងសំណូមពរ មកធនាគារ ARDB ផងដែរ។
យកឱកាសនៃការជួបជុំនៅព្រឹកនេះ លោកបណ្ឌិត កៅ ថាច បានធ្វើការផ្តាំផ្ញើរ សំណូមពរ និងជូនយោបល់មួយចំនួនដល់បងប្អូនកសិករ នៅក្នុងស្រុកគាស់ក្រឡ ៖
១.ណែនាំអំពីព័ត៌មានទីផ្សារស្វាយចន្ទីនៅក្នុងស្រុក និងទីផ្សារក្រៅប្រទេស ដែលបច្ចុប្បន្នកំពុងមានតំរូវការខ្ពស់។ ជាមួយគ្នានេះលោកបណ្ឌិត បានធ្វើការផ្សព្វផ្សាយអំពីគោល នយោបាយស្វាយចន្ទី និងគោលបំណងរបស់រាជរដ្ឋាភិបាលកម្ពុជា ចង់ប្រែក្លាយប្រទេសកម្ពុជា ជាអធិរាជនាំចេញ ស្វាយចន្ទី ទៅកាន់ពិភពលោក ។ ដូចនេះលោកចង់អោយបងប្អូន គួរចងក្រងគ្នា ជាសហគមន៍ ឬបណ្តុំផលិតស្វាយចន្ទី នៅក្នុងតំបន់របស់ខ្លួន ដោយរៀបចំអោយមានរចនាសម្ព័ន្អច្បាស់លាស់ មានឃ្លាំងស្តុក សប្បិកម្មកែច្នៃស្វាយចន្ទី របស់ខ្លួនផ្ទាល់។ ការណ៍នេះបងប្អូនអាចទទួលបានផលចំនេញច្រើន ចូលក្នុងសហគមន៍ផ្ទាល់ ដោយមិនមានការបារម្មណ៍ការទំលាក់ថ្លៃពីឈ្មួញកណ្តាល។ បន្ថែមលើនេះលោកបណ្ឌិត បានធ្វើការណែនាំផងដែរ អំពីកញ្ចប់ឥណទានពិសេស អត្រាការប្រាក់ទាប របស់រាជរដ្ឋាភិបាលគាំទ្រ ដល់ខ្សែច្រវាក់ផលិតកម្មស្វាយចន្ទី។ ដូចនេះបងប្អូន អាចធ្វើការទំនាក់ទំនង មានធនាគារ ARDB ដើម្បីទទួលបានកម្ចីអត្រាការប្រាក់ទាប។
២.ក្រៅពីកញ្ចប់ឥណទានគាំទ្រដល់ស្វាចន្ទី លោកបណ្ឌិត បានធ្វើការផ្សេព្វផ្សាយគោលការណ៍ឥណទានគាំទ្រដល់វិស័យកសិកម្មទាំងមូល មានដូចជា ការចញ្ចឹមសត្វ ដាំដុះបន្លែ ក្នុងផ្ទះសំណាញ់ ជាដើម។ល។ ដូចនេះ ក្នុងករណីបងប្អូន ប្រជាកសិករ ឬបណ្តុំផលិត ណាម្នាក់ចង់បានឥណទាន ដើម្បីពង្រីកការដាំដុះ ឬពង្រីកខ្សែច្រវាក់ផលិតកម្មរបស់ខ្លួន បងប្អូនអាចស្នើសុំឥណទានពីធនាគារ ARDB បានក្នុងអត្រាការប្រាក់សមរម្យ។
៣.ណែនាំអោយបងប្អូន កែប្រែទម្លាប់ពីការធ្វើកសិកម្មចញ្ជឹមឆ្នាំងបាយ អោយក្លាយជាការធ្វើកសិកម្មបែបសហគ្រិន ពោលគឺមានលទ្ធភាព ធ្វើការផ្គត់ផ្គង់ដល់ទីផ្សារ បន្ថែមពីលើការផ្គត់ផ្គង់ក្នុងគ្រួសារ។
៤.លើកទឹកចិត្តអោយបងប្អូនត្រូវធ្វើការសិក្សារៀន សូត្របន្ថែមអំពីបច្ចេកទេសដាំដុះ ដោយកុំធ្វើតាមទម្លាប់ដដែលៗ ដែលចេះតគ្នា។
៥.រៀនតាមដានតំលៃកសិផលនៅលើទីផ្សារ និងត្រូវចេះតាមដានព័ត៍មានព្យាករណ៍អាកាសធាតុ ហើយ ត្រូវចេះជ្រើសរើសការដាំដំណាំតាមរដូវ និងមានទីផ្សារ និងមានតំរូវការ ។ ណាមួយបងប្អូនគួរកុំជ្រើសរើសការដាំដុះដំណាំតាមគ្នា ដោយពុំមានព័ត៍មានច្បាស់លាស់។
៦.ណែនាំអោយបងប្អូនចេះកែប្រែដំណាំ និងកែប្រែដី ដើម្បីអោយការដាំដុះទទួលបានទិន្នផលខ្ពស់។
៧.ណែនាំ អោយបងប្អូនកុំទុកដីអោយទំនេរ និងកែប្រែទម្លាប់ ពីការដាំដុះដំណាំតែមួយមុខ អោយ ឆ្លៀតចញ្ចឹមសត្វបន្ថែម ដើម្បីទទួលបានចំណូលបន្ថែម។
៨.លោកបណ្ឌិត បានធ្វើការអំពាវនាវ ដល់បងប្អូនប្រជាកសិករ សហគនម៍កសិកម្ម ទាំងអស់ ដែលមានសិទ្ធិបោះឆ្នោត អញ្ជើញទៅចូលរួមបោះឆ្នោត ជ្រើសរើសតំណាងរាស្ត្រ នៅថ្ងៃទី២៣ ខែកក្កដា ខាងមុខនេះទាំងអស់គ្នា កុំបីខានផងដែរ ៕
