នយោបាយ

លោក សុខ ឥសាន ៖ គ ប មចង់ឲ្យបង្កើនថវិកា ១លានដុល្លារ ក្នុងឃុំ-សង្កាត់ ជានយោយបាយខ្យល់ របស់អតីត CNRP

ភ្នំពេញ ៖ គណបក្ស ប្រជាធិបតតេយ្យមូលដ្ឋាន(គ ប ម) ដែលចង់ឲ្យទំលាក់ថវិកា ក្នុង១ឃុំ-សង្កាត់ ចំនួន១លានដុល្លារ ត្រូវបានអ្នកនាំពាក្យ គណបក្សប្រជាជនកម្ពុជា លោក សុខ ឥសាន លើកឡើងតបទៅវិញថា មិនអាចធ្វើតាមសំណូមពរ ហើយក៏មិនអាចមិនទៅរួចនោះដែរ ។

លោក សុខ ឥសាន បានហៅថា ការចង់បានរបស់គ ប មនេះ គឺគោលនយោបាយខ្យល់ របស់អតីតគណបក្សសង្រ្គោះជាតិ (CNRP) ។

អ្នកនាំពាក្យបក្ស កាន់អំណាចតាមរយៈតេឡេក្រាម នៅព្រឹកថ្ងៃទី២៩ ខែតុលា ឆ្នាំ២០១៩នេះ បានថ្លែងថា “ចង់ឲ្យបង្កើនថវិកាដល់មូលដ្ឋាន១លានដុល្លារសម្រាប់ឃុំ-សង្កាត់នោះ គឺជានយោបាយខ្យល់ របស់អតីតគណបក្សសង្រ្គោះជាតិ កាលឃោសនាភូតកុហក ក្នុងយុទ្ធនាការឃោសនាបោះឆ្នោតនាពេលកន្លងមក” ។

លោកថា បើចង់បានអញ្ចេះចង់អញ្ចុះ របស់មេបក្សចាញ់ឆ្នោត ដូចនិយាយនោះ លុះត្រាតែធ្វើឲ្យគណបក្សខ្លួនឈ្នះឆ្នោតសិន ទើបអាចអនុវត្តតាមចិត្តខ្លួនបាន ។

គណបក្សប្រជាធិបតេយ្យមូលដ្ឋាន កាលពីថ្ងៃ២៥ តុលា បានទាមទារឲ្យរាជរដ្ឋាភិបាលកម្ពុជា បែងចែកថវិកាជាតិរហូតដល់២៥ភាគរយ ដើម្បីយកទៅអភិវឌ្ឍន៍មូលដ្ឋានរហូតដល់១លានដុល្លារក្នុង១ឃុំ-សង្កាត់ ។ ក្នុងនោះជាពិសេស ត្រូវធានាឲ្យមានផ្លូវល្អ មន្ទីរពេទ្យល្អ សាលារៀនល្អ និងគ្រូកសិកម្មល្អ ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top