ភ្នំពេញ ៖ ក្នុងរយៈពេលបីខែ នៃសម័យប្រជុំរដ្ឋសភាលើកទី៥ នីតិកាលទី៦ បានអនុម័តច្បាប់ចំនួន ២២ និងបានបិទបញ្ចប់ នៅព្រឹកថ្ងៃទី២៩ ខែធ្នូ ឆ្នាំ២០២០ ក្រោយប្រជុំប្រកាសសុពលភាព សមាជិកពីររូប ជំនួសសមាជិករដ្ឋសភា ដែលបានសុំលាលែងទៅកាន់តួនាទីថ្មី។
សម្តេច ហេង សំរិន ប្រធានរដ្ឋសភា ក្នុងសម័យប្រជុំនៅព្រឹកថ្ងៃ២៩ ធ្នូ បានប្រកាសថា សម័យប្រជុំរដ្ឋសភាលើកទី៥ នីតិកាលទី៦ បានចាប់ផ្តើមពីថ្ងៃទី៥ ខែតុលា ឆ្នាំ២០២០ រហូតមកដល់ថ្ងៃទី៥ ខែមករា ឆ្នាំ២០២១ មាន រយៈពេល បីខែ ស្របតាមរដ្ឋធម្មនុញ្ញ និងបទបញ្ជាផ្ទៃក្នុងរដ្ឋសភា។
សម្តេចបន្តថា នៅក្នុងរយៈពេល បីខែមកនេះ សម័យប្រជុំរដ្ឋសភា សម្រេចបានលទ្ធផលដូចជា ៖ អនុម័តសេចក្តីព្រាងច្បា់បានចំនួន២២ សម្រេចអំពីសុពលភាព នៃអាណត្តិរបស់បេក្ខជន ជាប់ឆ្នោត ជាតំណាងរាស្រ្ត ២រូប នីតិកាលទី៦ នៃរដ្ឋសភាគឺ លោកលី ស៊ុគ្រី ជាតំណាងរាស្រ្តមណ្ឌលខេត្តតាកែវ ជំនួសលោក សុខ សូកាន និងលោកសៅ សារ៉ាត់ ជាតំណាងរាស្រ្តមណ្ឌលខេត្តប៉ៃលិន ជំនួសលោកស្រី បាន ស្រីមុំ។
ក្នុងនោះក៏បានបោះឆ្នោតជ្រើសតាំងលោក ខៀវ ភារិទ្ធ ជាសមាជិកគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ និងលោកស្រី នូ សុវណ្ណនី ជាសមាជិកគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់។
ប្រធានរដ្ឋសភា បានប្រកាសជូនអង្គសភាថា ” ប្រសិនបើសម័យប្រជុំរដ្ឋសភា លើកទី៥ នីតិកាលទី៦ ពុំមានរបៀបវារៈសម្រាប់ធ្វើការ ពិភាក្សា និងអនុម័តទៀតទេ សូមប្រកាសបិទសម័យប្រជុំរដ្ឋសភា លើកទី៥ នីតិកាលទី៦ ចាប់ពីថ្ងៃទី៥ ខែមករា ឆ្នាំ២០២១ តទៅ”៕
