តេអេរ៉ង់៖ ទីភ្នាក់ងារសារព័ត៌មានផ្លូវការ IRNA បានរាយការណ៍ថា ក្រសួងការបរទេសអ៊ីរ៉ង់ នៅថ្ងៃពុធម្សិលមិញនេះ បានរិះគន់សេចក្តីសម្រេចចិត្តរបស់សហរដ្ឋអាមេរិក ក្នុងការដាក់បញ្ជីឈ្មោះចលនាក្រុម Houthi របស់យេម៉ែន ជាក្រុមភេរវករ។
អ្នកនាំពាក្យក្រសួងការបរទេសលោក Saeed Khatibzadeh ត្រូវបានគេដកស្រង់សម្ដីដោយនិយាយថា“ ការសម្រេចចិត្តនេះប៉ះពាល់ ដល់ការដោះស្រាយជម្លោះ និងការបញ្ជូនជំនួយមនុស្សធម៌ដោយសន្តិវិធី។
លោក Khatibzadeh បានបន្ថែមថា“ នេះគឺជាកិច្ចខិតខំប្រឹងប្រែងចុងក្រោយ បង្អស់របស់រដ្ឋបាលលោក ដូណាល់ ត្រាំ ដើម្បីបំពេញតួនាទីបំផ្លិចបំផ្លាញរបស់ខ្លួន ស្របតាមការដាក់បញ្ចូលសង្គ្រាម គួរឱ្យអាម៉ាស់ទៅលើប្រទេសយេម៉ែន” ។
នៅក្នុងនោះដែរ លោកបានអំពាវនាវដល់សហគមន៍ អន្តរជាតិឱ្យមានប្រតិកម្មចំពោះ“ សេចក្តីសម្រេចចិត្តដ៏កាចសាហាវនេះ ដោយរដ្ឋបាលលោក ដូណាល់ ត្រាំ” ។
រដ្ឋមន្រ្តីការបរទេសសហរដ្ឋអាមេរិកលោក Mike Pompeo បានបានលើកឡើងផងដែរថា ក្រសួងការបរទេសសហរដ្ឋអាមេរិក នឹងដាក់បញ្ជីឈ្មោះក្រុម Houthis របស់យេម៉ែន ជាក្រុមភេរវករនៅថ្ងៃទី១៩ ខែមករា ៕
ដោយ ឈូក បូរ៉ា
