សេអ៊ូល៖ កាសែតផ្លូវការរបស់កូរ៉េខាងជើង នៅថ្ងៃពុធនេះ បានអំពាវនាវឱ្យមានកិច្ចខិតខំប្រឹងប្រែង កាន់តែខ្លាំងឡើង ដើម្បីសម្រេចបាននូវសេដ្ឋកិច្ច ដែលពឹងផ្អែកលើខ្លួនឯង ដោយគ្មានជំនួយពីខាងក្រៅ ចំពេលមានការតស៊ូ ដើម្បីសម្រេចគោលដៅសំខាន់ៗ ដែលត្រូវបានបង្ហាញ នៅក្នុងការប្រជុំគណបក្សដ៏កម្រមួយ កាលពីខែមុន។
គណបក្សកាន់អំណាចរបស់កូរ៉េខាងជើង បានឲ្យដឹងនៅក្នុងវិចារណកថាមួយ “ នៅពេលយើងជួបការលំបាក ក្នុងដំណើរការនៃការបំពេញភារកិច្ចរបស់យើង យើងមិនត្រូវពឹងផ្អែក លើជំនួយពីខាងក្រៅនោះទេ តែត្រូវដោះស្រាយបញ្ហា ដោយសហការយ៉ាងជិតស្និទ្ធ ជាមួយផ្នែកផលិតកម្មស្រាវជ្រាវ និងអភិវឌ្ឍន៍” ។
កាសែតនេះបានសង្កត់ធ្ងន់លើសារសំខាន់ នៃកិច្ចសហប្រតិបត្តិការរវាងវិស័យ និងផ្នែកផ្សេងៗគ្នាក្នុងសេដ្ឋកិច្ច ហើយបានព្រមានប្រឆាំងនឹង“ ជំនាញឯកទេស និងភាពជាមជ្ឈិមនិយម ដែលធ្វើឱ្យអន្តរាយដល់សង្គមនិយម ផ្អែកលើសមូហភាពនិយមរបស់យើង” ។
នៅក្នុងអត្ថបទដាច់ដោយឡែកមួយកាសែត បានអំពាវនាវដល់មន្រ្តីកំពូល ឱ្យធ្វើការដោយមានភក្តីភាព និងការទទួលខុសត្រូវខ្ពស់ ដោយថា ឋានៈខ្ពស់របស់ពួកគេ គឺជា“ សញ្ញានៃការជឿទុកចិត្ត និងការរំពឹងទុក ក៏ដូចជាវិសាលភាព ដែលត្រូវ សងមកវិញ”។
ប្រទេសកូរ៉េខាងជើង បានបង្កើនការអំពាវនាវ ឱ្យមានកិច្ចខិតខំប្រឹងប្រែង ដើម្បីឯករាជ្យពីជំនួយខាងក្រៅ ក្នុងការអភិវឌ្ឍសេដ្ឋកិច្ចរបស់ខ្លួន ចាប់តាំងពីដើមឆ្នាំ ខណៈមេដឹកនាំលោក គីម ជុងអ៊ុន បានបង្ហាញនូវការមិនសប្បាយចិត្ត ចំពោះការរីកចម្រើនតិចតួចក្នុងការបន្ធូរបន្ថយ ឬដកទណ្ឌកម្មចំពេល មានកិច្ចចរចានុយក្លេអ៊ែរជាប់គាំង ជាមួយក្រុងវ៉ាស៊ីនតោន។
នៅក្នុងសមាជលើកទី ៨ របស់គណបក្សពលករ ដែលកំពុងកាន់អំណាចកាលពីខែមុនលោក គីម បានទទួលស្គាល់ថា ការខកខានមិនបានបំពេញ តាមគោលដៅអភិវឌ្ឍន៍រយៈពេល ៥ ឆ្នាំរបស់ប្រទេស និងបានដាក់ចេញនូវផែនការ ៥ ឆ្នាំថ្មីផ្តោតលើភាពខ្លួនទីពឹងខ្លួន។
កូរ៉េខាងជើង ហាក់ដូចជាកំពុងស្វែងរកមធ្យោបាយជាក់ស្តែង ដើម្បីសម្រេចបាននូវសេដ្ឋកិច្ចខ្លួនទីពឹងខ្លួន ចំពេលមានបញ្ហាប្រឈមជាច្រើន រួមមានយុទ្ធនាការកំចាត់មេរោគ ដែលកំពុងបន្តការបំផ្លិចបំផ្លាញ ដែលបណ្តាលមកពីព្យុះទីហ្វុង និងវិបត្តិសេដ្ឋកិច្ចពីទណ្ឌកម្មពិភពលោក៕ ដោយ៖ ឈូក បូរ៉ា
