បរទេស ៖ ប្រទេសព្រុយណេ ដែលជាប្រធានសមាគម អាស៊ាន នៅថ្ងៃចន្ទនេះ បានបង្ហាញនូវការគំាទ្រ ឲ្យមានកិច្ចប្រជុំមេដឹកនាំក្នុងតំបន់ ដើម្បីពិភាក្សាគ្នា អំពីដំណើរវិវត្តនានា នៅក្នុងប្រទេស មីយ៉ានម៉ា និងបាននិយាយប្រាប់ថា ខ្លួនបានស្នើឲ្យមន្ត្រីជំនាញធ្វើការត្រៀមរៀបចំ សម្រាប់កិច្ចប្រជុំមួយ នៅក្នុងទីក្រុងចាកាតា ។
នៅក្នុងសេចក្តីថ្លែងការណ៍រួមគ្នាមួយ ជាមួយម៉ាឡេស៊ី ប្រទេសព្រុយណេ បាននិយាយប្រាប់ថា ប្រទេសទាំងពីរ បានស្នើឲ្យរដ្ឋមន្ត្រី និងមន្ត្រីជាន់ខ្ពស់នានា ធ្វើការត្រៀមរៀបចំចាំបាច់ សម្រាប់កិច្ចប្រជុំ ដែលនឹងប្រារព្ធធ្វើឡើង នៅលេខាធិការដ្ឋាន អាស៊ាន ក្នុងទីក្រុងចាកាតា ប្រទេសឥណ្ឌូនេស៊ី ។
ប្រទេសឥណ្ឌូនេស៊ី នាពេលថ្មីៗនេះ បានដឹកនាំកិច្ចប្រឹងប្រែងធ្វើឡើង ដោយសមាជិកអាស៊ាន ដើម្បីជំរុញឲ្យមានដំណោះស្រាយតាមរយៈការចរចាគ្នា បើទោះជាមានគោលនយោបាយយូរអង្វែង ស្តីពីការមិនបញ្ចេញយោបល់ លើបញ្ហាក្នុងស្រុករបស់គ្នា ទៅវិញទៅមក ក៏ដោយ ។
គួរបញ្ជាក់ថា ប្រទេសមីយ៉ានម៉ា បានធ្លាក់ចូលក្នុងវិបត្តិ ចាប់តាំងពីរដ្ឋប្រហារថ្ងៃទី០១ខែកុម្ភៈ ដែលបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុង សានស៊ូជីមក។ សកម្មជននិយាយថា មនុស្សតិចបំផុត ៥៥៧នាក់ ត្រូវបានសម្លាប់ ក្នុងប្រតិបត្តិការ បង្រ្កាបធ្វើឡើងដោយកងកម្លាំងសន្តិសុខលើការ តវ៉ានៅទូទាំងប្រទេស ៕
ប្រែសម្រួល៖ប៉ាង កុង
