តេអេរ៉ង់ ៖ អនុរដ្ឋមន្រ្តីក្រសួងការបរទេសអ៊ីរ៉ង់ លោក Ali Bagheri បានលើកឡើងថា ការអនុវត្តជំហានជាក់ស្តែងជាមួយ លទ្ធផលជាក់ស្តែង អាចជាគោលបំណង នៃកិច្ចចរចានុយក្លេអ៊ែរ នាពេលខាងមុខរវាងអ៊ីរ៉ង់ និងភាគី ដែលនៅសល់ ចំពោះកិច្ចព្រមព្រៀង នុយក្លេអ៊ែរ ឆ្នាំ២០១៥ ដែលត្រូវបានគេស្គាល់ថា ជាផែនការសកម្មភាពរួមគ្នា (JCPOA) ។
មន្រ្តីអ៊ីរ៉ង់រូបនេះបានធ្វើសុន្ទរកថានេះ នៅក្នុងកិច្ចប្រជុំជាមួយអគ្គលេខាធិការរង នៃទីភ្នាក់ងារទទួលបន្ទុកសកម្មភាព ខាងក្រៅអឺរ៉ុប លោក Enrique Mora នៅរដ្ឋធានីតេអេរ៉ង់ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
ក្នុងអំឡុងកិច្ចប្រជុំលោក Bagheri បានលើកឡើងថាអ៊ីរ៉ង់ តែងតែបង្ហាញពីការទទួល ខុសត្រូវ ចំពោះកិច្ចការអន្តរជាតិ ខណៈឥរិយាបថរបស់ភាគីម្ខាងទៀត សហរដ្ឋអាមេរិកបានបង្ហាញថា វានៅឆ្ងាយពីការក្លាយ ជាអ្នកលេងដែលមានការទទួលខុសត្រូវ ។
លោកបន្ថែមថាភាគីដែលបង្ហាញការទទួលខុសត្រូវ កាន់តែច្រើន គឺនៅកាន់តែជិតតុចរចា។ ទន្ទឹមនឹងនេះដែរ លោកបានដាក់ការសង្ស័យយ៉ាងធ្ងន់ធ្ងរ ទៅលើចេតនាពិតប្រាកដរបស់សហរដ្ឋអាមេរិកក្នុងការ បំពេញកាតព្វកិច្ចរបស់ខ្លួន។
លោកបានដកស្រង់សម្តី ដោយគេហទំព័ររបស់ក្រសួង ការបរទេសអ៊ីរ៉ង់ថា“ ការសម្រេចបាន នូវលទ្ធផលជាក់ស្តែង គឺមានសារៈសំខាន់ សម្រាប់ប្រទេសអ៊ីរ៉ង់ ព្រោះទីក្រុងតេអេរ៉ង់តែងតែត្រៀមខ្លួន សម្រាប់ការចរចាដ៏ធ្ងន់ធ្ងរ ដែលជាលទ្ធផល នៃកិច្ចព្រមព្រៀងជាក់ស្តែង និងមិនមែនគ្រាន់ តែជាកិច្ចព្រមព្រៀងក្រដាសនោះទេ” ។
លោកក៏បានរិះគន់នូវអ្វីដែលលោកហៅថា“ អសកម្ម” របស់ភាគីអឺរ៉ុប ក្នុងការបំពេញតាមការប្តេជ្ញាចិត្ត របស់ពួកគេ ក្រោមកិច្ចព្រមព្រៀង JCPOA ដោយសង្កត់ធ្ងន់លើតម្រូវការឱ្យពួកគេ“ ធ្វើសកម្មភាពប្រកបដោយការ ទទួលខុសត្រូវ” ។
យោងតាមសេចក្តីប្រកាសព័ត៌មាន របស់ក្រសួងការបរទេសអ៊ីរ៉ង់លោក បានប្រកាសពីការត្រៀមខ្លួន ក្នុងនាមជាអ្នកសម្របសម្រួល សហភាពអឺរ៉ុប ដើម្បីសហការជាមួយអ៊ីរ៉ង់ និងភាគីផ្សេងទៀត ក្នុងការចរចា ដើម្បីសម្រេចបាននូវលទ្ធផល ដែលអាចទទួលយកបាន សម្រាប់គ្រប់ភាគី៕
ដោយ ឈូក បូរ៉ា
