ស្តុកខុម៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី១៣ ខែធ្នូ ឆ្នាំ២០២១ ថានាវិក ២នាក់បានបាត់ខ្លួន ហើយប្រតិបត្តិការជួយសង្គ្រោះ មួយត្រូវបានចាប់ផ្តើម បន្ទាប់ពីកប៉ាល់ដឹកទំនិញ បានលិចនៅក្នុងសមុទ្របាល់ទិក នៅឆ្នេរសមុទ្រភាគខាងត្បូង នៃប្រទេសស៊ុយអែត នៅថ្ងៃចន្ទនេះ ។
ឧបទ្ទវហេតុនេះ បានកើតឡើងនៅម៉ោង ៣និង៣០នាទីព្រឹក ម៉ោងក្នុងស្រុក ត្រូវនឹងម៉ោង ២និង៣០នាទីម៉ោងសកល នៅចន្លោះទីក្រុង Ystad របស់ស៊ុយអែត និងកោះ Bornholm របស់ប្រទេសដាណឺម៉ាក ក្នុងអំឡុងពេលមានអ័ព្ទ ហើយអាចបណ្តាលមកពី ការបុកជាមួយនាវាមួយផ្សេងទៀត ។ ទូរទស្សន៍ស៊ុយអែត ដែលជាទូរទស្សន៍សាធារណៈជាតិ បានរាយការណ៍ឲ្យដឹងនៅថ្ងៃចន្ទនេះ ។
កាសែតស៊ុយអែត Aftonbladet បានរាយការណ៍ថា នាវា និងឧទ្ធម្ភាគចក្រប្រហែល ១០គ្រឿងមកពីស៊ុយអែត និងដាណឺម៉ាក ត្រូវបានដាក់ពង្រាយ សម្រាប់ប្រតិបត្តិការជួយសង្គ្រោះ ។
ការជួយសង្គ្រោះត្រូវបានចាប់ផ្តើម បន្ទាប់ពីការជូនដំណឹង ដោយស្វ័យប្រវត្តិពីកប៉ាល់ដែលលិច ហើយនាវិកមិនត្រូវបានរកឃើញ ប៉ុន្មានម៉ោងបន្ទាប់ពីឧបទ្ទវហេតុនេះ លោក Jesper Berthelsen មន្ត្រីកាតព្វកិច្ចនៃមជ្ឈមណ្ឌល ប្រតិបត្តិការរបស់កងកម្លាំង ប្រដាប់អាវុធដាណឺម៉ាក បានប្រាប់ទីភ្នាក់ងារសារព័ត៌មាន Ritzau របស់ដាណឺម៉ាក យ៉ាងដូច្នេះ ។
ប្រែសម្រួលដោយ៖ ម៉ៅ បុប្ផាមករា
