កូឡាឡាំពួរ៖ ទូរទស្សន៍សិង្ហបុរី Channel News Asia បានផ្សព្វផ្សាយព័ត៌មាននៅថ្ងៃទី២៥ ខែធ្នូ ឆ្នាំ២០២១ថា ចំនួនអ្នកស្លាប់ ដោយសារគ្រោះទឹកជំនន់ ដ៏អាក្រក់បំផុត របស់ម៉ាឡេស៊ី ក្នុងរយៈពេលកន្លងមកនេះ បានកើនឡើងដល់៤៦នាក់ហើយ គិតត្រឹមនៅថ្ងៃសៅរ៍ ដោយមនុស្ស៥នាក់នៅតែបាត់ខ្លួន ខណៈក្រុមបុគ្គលិកបន្តការរុករកដ៏ធំនៅថ្ងៃបុណ្យណូអែលនេះ ។
ភ្លៀងធ្លាក់ខ្លាំងជាច្រើនថ្ងៃបានធ្វើឱ្យទឹកទន្លេហូរហៀរកាលពីចុងសប្តាហ៍មុន ដោយបានជន់លិចទីក្រុង កាត់ផ្តាច់ផ្លូវសំខាន់ៗ និងបង្ខំឱ្យមនុស្សរាប់ម៉ឺននាក់ភៀសខ្លួនចេញពីផ្ទះរបស់ពួកគេ ។
Selangor ជារដ្ឋដែលមានប្រជាជនច្រើនជាងគេ និងសម្បូរបំផុតរបស់ម៉ាឡេស៊ី ដែលឡោមព័ទ្ធរដ្ឋធានី Kuala Lumpur គឺជាតំបន់មួយដែលរងគ្រោះខ្លាំងជាងគេបំផុត ។
មនុស្សជាច្រើននៅក្នុងរដ្ឋធានី Shah Alam របស់រដ្ឋដែលរងគ្រោះដោយទឹកជំនន់ត្រូវបានទុកចោលនៅក្នុងផ្ទះរបស់ពួកគេដោយមិនមានអាហារសម្រាប់ប្រចំាថ្ងៃមុនពេលត្រូវបានជម្លៀសនៅលើទូកក្នុងប្រតិបត្តិការជួយសង្គ្រោះដ៏វឹកវរមួយ។
អគ្គអធិការនៃប៉ូលិស Acryl Sani Abdullah Sani បានលើកឡើងថា ចំនួនអ្នកស្លាប់បានកើនឡើងដល់៤៦នាក់ ខណៈដែលសាកសពកាន់តែច្រើនត្រូវបានគេរកឃើញ ដោយភាគច្រើននៃអ្នកស្លាប់នៅក្នុងរដ្ឋ Selangor និង Pahang ។
គាត់បានប្រាប់សន្និសីទសារព័ត៌មានថា “នៅតែមានមនុស្ស៥នាក់កំពុងបាត់ខ្លួន ។ យើងសង្ឃឹមថា ពួកគេនឹងត្រូវបានរកឃើញក្នុងពេលឆាប់ៗនេះ” ។
លោកបានលើកឡើងថា មនុស្សចំនួន៥៤.៥៣២នាក់នៅតែស្ថិតក្នុងមជ្ឈមណ្ឌលជម្លៀសជាង៣០០នាក់នៅទូទាំងរដ្ឋចំនួន ៧ ហើយផ្លូវចំនួន៦៨ខ្សែនៅតែត្រូវបានបិទដោយសារតែទឹកជំនន់ ៕
ដោយ៖ ម៉ៅ បុប្ផាមករា
