ភ្នំពេញ៖ ជនត្រូវចោទប្រុស-ស្រី ចំនួន៣នាក់ កាលពីរសៀលថ្ងៃទី១០ ខែ មករា ឆ្នាំ ២០២២ ត្រូវបានចៅក្រមស៊ើបសួរ សាលាដំបូងខេត្តព្រៃវែង ចាប់ និង បង្គាប់ឲ្យឃុំខ្លួន នៅក្នុងពន្ធនាគារ ជាបណ្ដោះអាសន្ន ជាប់ពាក់ព័ន្ធនឹង ជួញដូរ ប្រព្រឹត្តនៅចំណុចភូមិ១ សង្កាត់កំពង់លាវ ក្រុងព្រៃវែង ខេត្តព្រៃវែង។
យោងតាម របាយការណ៍របស់មន្ត្រីនគរបាលប្រឆាំងគ្រឿងញៀនខេត្តព្រៃវែង
បានឲ្យដឹងថា ជនត្រូវចោទទាំង៣នាក់ មានឈ្មោះ ទី១- ឈ្មោះ ញាណ សុវណ្ណគង្គា ភេទប្រុស អាយុ ២៨ឆ្នាំ មុខរបរមិនពិតប្រាកដ រស់នៅភូមិ០១ សង្កាត់កំពង់លាវ ក្រុងព្រៃវែង ខេត្តព្រៃវែង។ ទី២- ឈ្មោះ ហ៊ឹម វ៉ាន់ស៊ី ភេទស្រី អាយុ ២៩ឆ្នាំ មុខរបរកម្មករ រស់នៅភូមិលោ ឃុំកំពាន់ ស្រុកមេមត់ ខេត្តត្បូងឃ្មុំ ។ និង ទី ៣- ឈ្មោះ ហួន ហ៊ាប ភេទប្រុស អាយុ ២៣ឆ្នាំ មុខរបរកម្មករ រស់នៅភូមិជើងទឹក(ក) សង្កាត់ជើងទឹកក្រុងព្រៃវែង ខេត្តព្រៃវែង។
ពួកគេ ត្រូវបានតំណាងអយ្យការចោទប្រកាន់ពីបទ ” ជួញដូរ ដោយខុសច្បាប់ នូវសារធាតុញៀន ” តាមមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន និង ត្រូវបានសមត្ថកិច្ចនគរបាលចាប់ខ្លួនកាលថ្ងៃទី ៦ ខែមករា ឆ្នាំ២០២២ នៅចំណុចភូមិ១ សង្កាត់កំពង់លាវ ក្រុងព្រៃវែង ខេត្តព្រៃវែង ។
សមត្ថកិច្ចនគរបាល ដកហូតបាន គ្រឿងញៀនប្រភេទមេតំហ្វេតាម៉ីន ចំនួន ៧៣កញ្ចប់ មានទម្ងន់ ៤៤,៩៨ក្រាម , ទូរសព្ទដៃ ចំនួន៣គ្រឿង, ឧបករណ៍សម្រាប់ជក់ថ្នាំ ចំនួន ២សម្រាប់, កែវជក់ថ្នាំចំនួន១០, ដែកកេះ ៥, កន្ត្រៃ ២, និងថង់វេចខ្ចប់មួយចំនួន៕
ដោយ រស្មី អាកាស
