គៀវ៖ ទីភ្នាក់ងារព័ត៌មានចិនស៊ិនហួ បានផ្សព្វផ្សាយនៅថ្ងៃទី១១ ខែឧសភា ឆ្នាំ២០២២ថា ប្រធានការិយាល័យប្រធានាធិបតីអ៊ុយក្រែន លោក Andriy Yermak បានលើកឡើងកាលពីថ្ងៃអង្គារថា លោក Leonid Kravchuk ប្រធានាធិបតីទី១នៃឯករាជ្យអ៊ុយក្រែន បានទទួលមរណភាពក្នុងវ័យ ៨៨ឆ្នាំ។
លោក Yermak បានសរសេរនៅលើទំនាក់ទំនង Telegram ថា “លោក Leonid Makarovych (Kravchuk) គឺជាអ្នកស្នេហាជាតិដ៏ឈ្លាសវៃ របស់អ៊ុយក្រែន ដែលជាឥស្សរជនប្រវត្តិសាស្ត្រ ក្នុងការទទួលបានឯករាជ្យរបស់យើង” ។
លោក Kravchuk បានបម្រើការជាប្រធានាធិបតីអ៊ុយក្រែន នៅចន្លោះខែធ្នូ ឆ្នាំ១៩៩១ ដល់ខែកក្កដា ឆ្នាំ១៩៩៤ ។ ក្រោយមកគាត់បានបម្រើការ ជាសមាជិកសភាអ៊ុយក្រែន និងជាមេដឹកនាំក្រុមសភាគណបក្ស សង្គមប្រជាធិបតេយ្យអ៊ុយក្រែន ។
គួរបញ្ជាក់ថា លោក Kravchuk ក៏ជាប្រធានកិត្តិយសនៃ សមាគមមិត្តភាពអ៊ុយក្រែន-ចិនផងដែរ ៕
ប្រែសម្រួលដោយ៖ ម៉ៅ បុប្ផាមករា
