បរទេស៖ ទីប្រឹក្សាសន្តិសុខជាតិ របស់ប្រទេសកូរ៉េខាងត្បូង លោក Kim Sung-han បានបង្ហាញកាលពីថ្ងៃពុធថា ប្រទេសកូរ៉េខាងត្បូង គ្រោងនឹងរៀបចំឱ្យមានបេសកកម្ម នៅទីស្នាក់ការកណ្តាលរបស់អង្គការណាតូ នៅអឺរ៉ុប។ មន្ត្រីរូបនេះបានពន្យល់ថា ទីក្រុងសេអ៊ូល ដែលជាសម្ព័ន្ធមិត្តដ៏ជិតស្និទ្ធយូរអង្វែង របស់ទីក្រុងវ៉ាស៊ីនតោន កំពុងស្វែងរកការពង្រឹង កិច្ចសហប្រតិបត្តិការរបស់ខ្លួន ជាមួយប្លុកដែលដឹកនាំដោយសហរដ្ឋអាមេរិក ក្នុងការប្រឈមមុខនឹងស្ថានភាពអន្តរជាតិ “ដែលមិនអាចទាយទុកជាមុនបាន” ។
យោងតាមសារព័ត៌មាន RT ចេញផ្សាយនៅថ្ងៃទី២២ ខែមិថុនា ឆ្នាំ២០២២ បានឱ្យដឹង ដោយផ្អែកតាមការលើកឡើង របស់លោក Kim នៅក្នុងសន្និសីទសារព័ត៌មានមួយថា “តាមរយៈការបង្កើតបេសកកម្ម របស់អង្គការណាតូ នៅទីក្រុងប្រ៊ុចសែល ប្រទេសបែលហ្សិក ដែលអង្គការណាតូ មានទីស្នាក់ការ នោះ យើងនឹងអាចបង្កើនការចែករំលែកព័ត៌មាន និងពង្រឹងបណ្តាញរបស់យើងជាមួយសមាជិកណាតូ និងប្រទេសជាដៃគូ”។
ប្រព័ន្ធផ្សព្វផ្សាយក្នុងស្រុកបានរាយការណ៍ ដោយដកស្រង់សម្តីមន្ត្រីប្រធានាធិបតី ដែលមិនបញ្ចេញឈ្មោះថា បេសកកម្មថ្មីនេះ ត្រូវបានគេរំពឹងថា នឹងដឹកនាំដោយបេសកជនកូរ៉េខាងត្បូង ប្រចាំប្រទេសបែលហ្ស៊ិក លោក Yoon Soongu ។ ភ្លាមៗនោះ គេមិនទាន់ដឹងច្បាស់ថា តើលោកនឹងបន្តកាន់តំណែងបច្ចុប្បន្ន ឬយ៉ាងណានោះទេ ព្រោះថា បេសកជនរូបនេះ ក៏កើនឡើងទ្វេដង ជាឯកអគ្គរដ្ឋទូតប្រចាំសហភាពអឺរ៉ុបផងដែរ។
សូមជម្រាបថា ប្រធានាធិបតី របស់ប្រទេសកូរ៉េខាងត្បូង លោក Yoon Suk-yeol ត្រូវបានគេរំពឹងថា នឹងចូលរួមកិច្ចប្រជុំកំពូល NATO នៅទីក្រុងម៉ាឌ្រីដ ប្រទេសអេស្បាញ ដែលគ្រោងធ្វើនៅថ្ងៃទី 29-30 ខែមិថុនា ដោយព្រឹត្តិការណ៍នេះ បានក្លាយជាដំណើរទស្សនកិច្ចអន្តរជាតិដ៏សំខាន់លើកដំបូង សម្រាប់ប្រធានាធិបតី ដែលបានចូលកាន់តំណែងនៅថ្ងៃទី 10 ខែឧសភា។ នេះក៏ជាលើកទីមួយផងដែរ មិនធ្លាប់មានសម្រាប់ប្រធានាធិបតីកូរ៉េខាងត្បូង ចូលរួមកិច្ចប្រជុំកំពូលណាតូ៕
