រុស្ស៊ី៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី២៨ ខែមិថុនា ឆ្នាំ២០២២ថា លោក ឌីមេទ្រី ម៉េវ៉េឌីវ (Dmitry Medvedev) ត្រូវបានដកស្រង់សម្តី ដែលបានថ្លែងកាលពីថ្ងៃចន្ទថា ការឈ្លានពានណាមួយ នៅលើឧបទ្វីបគ្រីមៀ ដោយរដ្ឋសមាជិក អង្គការ NATO អាចស្មើនឹងការប្រកាស សង្គ្រាមលើប្រទេសរុស្ស៊ី ដែលអាចនាំឱ្យមាន “សង្គ្រាមលោកលើកទី៣” ។
លោក ម៉េវ៉េឌីវ បានប្រាប់ ដល់គេហទំព័រព័ត៌មាន Argumenty i Fakty ថា “សម្រាប់ពួកយើង គ្រីមៀ (Crimea) គឺជាផ្នែកមួយ នៃប្រទេសរុស្ស៊ី ។ ហើយវាមានន័យជារៀងរហូត ។ ការប៉ុនប៉ងណាមួយ ដើម្បីឈ្លានពានលើទ្វីប Crimea គឺជាការប្រកាសសង្រ្គាម ប្រឆាំងនឹងប្រទេស របស់យើង” ។
“ហើយប្រសិនបើនេះ ត្រូវបានធ្វើដោយរដ្ឋសមាជិកអង្គការ NATO នេះមានន័យថា ជម្លោះជាមួយសម្ព័ន្ធមិត្តអាត្លង់ទិក ខាងជើងទាំងមូល សង្គ្រាមលោកលើកទី៣ ពិតជាបង្កឲ្យមានមហន្តរាយទាំងស្រុង” ។ លោកបានថ្លែងយ៉ាងដូច្នេះ ។
លោក ម៉េវ៉េឌីវ ដែលបច្ចុប្បន្ន ជាអនុប្រធានក្រុមប្រឹក្សាសន្តិសុខ របស់ប្រទេសរុស្ស៊ី ក៏បានថ្លែងផងដែរថា ប្រសិនបើហ្វាំងឡង់ និងស៊ុយអែត ចូលរួមជាមួយអង្គការ NATO រុស្ស៊ីនឹងពង្រឹងព្រំដែន របស់ខ្លួន ហើយនឹង “ត្រៀមខ្លួនសម្រាប់ជំហានសងសឹក” ហើយវាអាចរួមបញ្ចូល ការរំពឹងទុកនៃការដំឡើង មីស៊ីល Iskander លើកម្រិតកំណត់របស់ពួកគេ” ៕ ប្រែសម្រួលដោយ៖ ម៉ៅ បុប្ផាមករា
