ភ្នំពេញ ៖ ក្រោយពីក្រុមអតីតគណបក្សសង្គ្រោះជាតិនៅក្រៅប្រទេសរៀបចំគម្រោងផែនការឲ្យ លោកសម រង្ស៊ីវិលមកកម្ពុជាជាលើកទី២ នៅនៅឆ្នាំនេះ អ្នកនាំពាក្យរាជរដ្ឋាភិបាល លោក ផៃ ស៊ីផាន បានថ្លែងថា គម្រោងនេះគ្មានអ្វីជាឧបសគ្គដល់ពួកគាត់ឡើយ ក៏ប៉ុន្ដែត្រូវដោះស្រាយជា មួយតុលាការនៅកម្ពុជា ជាមុនសិន។
ថ្មីៗនេះ មន្ត្រីជាន់ខ្ពស់អតីតគណបក្សសង្គ្រោះជាតិដែលមានសាខានៅក្រៅប្រទេស បានលើកឡើងពីផែនការមាតុភូមិនិវត្តន៍ទី២របស់លោក សម រង្ស៊ី សម្រាប់ឆ្នាំ២០២០។ នេះបើយោងតាមការចេញផ្សាយ របស់វិទ្យុអាស៊ីសេរី។
កាលពីថ្ងៃ៩ វិច្ឆិកា កន្លងមកនេះ លោក សម រង្ស៊ីបានប្រកាសពីការវិលត្រឡប់មកវិញដែរ តែត្រូវបរាជ័យ។
ភ្លាមៗនោះ លោក ផៃ ស៊ីផាន ប្រាប់មជ្ឈមណ្ឌលព័ត៌មានដើមអម្ពិលនៅថ្ងៃទី២០ ខែមករា ឆ្នាំ២០២០ ថា ផែនការវិលមកស្រុកខ្មែរ របស់ក្រុមអតីត បក្សសង្គ្រោះជាតិគឺលើក ឡើងដើម្បីឲ្យគេចាប់អារម្មណ៍ ផ្នែកនយោបាយតែប៉ុណ្ណោះ ។
លោកមានប្រសាសន៍ថា «កម្ពុជា ជាមាតុភូមិរបស់ពួកគេ (ក្រុមអតីតបក្សសង្គ្រោះជាតិ) គ្មានរឿងអ្វីដែលជាឧបសគ្គសម្រាប់ពួកគេមកទេ។ ក៏ប៉ុន្ដែ អ្នកនៅក្នុងក្រុមហ្នឹង ក៏មានក្រុមខ្លះជាប់កត្តាកិច្ចជាមួយតុលាការ ត្រូវបំពេញកាតព្វកិច្ចជាមួយតុលាការរបស់ពួកគេ ដែលអាជ្ញាធរក្នុងដែនអំណាចយុត្តិធម៌ហ្នឹង អញ្ជើញអ្នកត្រឡប់មកវិញហ្នឹង ទៅតុលាការ ដើម្បីឆ្លើយតបពីការចោទរបស់តុលាការ» ។
ទោះបី លោកសម រង្ស៊ី មិនបោះបង់ការប៉ុនប៉ងវិលត្រឡប់ទៅកម្ពុជាវិញ ដោយលោកអះអាងថា ដើម្បីទៅស្ដារសិទ្ធិមនុស្ស និងប្រជាធិបតេយ្យវិញ ជាពិសេសកុំឲ្យសហភាពអឺរ៉ុបព្យួរការអនុគ្រោះពន្ធ EBA លោក ផៃ ស៊ីផាន បានឆ្លើយយ៉ាងខ្លីថា «មិនមែនពាក់ព័ន្ធ រឿង EBA ទេ” ៕
ដោយ ៖ អេង ប៊ូឆេង
