វ៉ាស៊ីនតោន៖ FBI បានប្រមូលឯកសារ ដែលបានចាត់ថ្នាក់ជាង ១០ ពីរមណីយដ្ឋាន Mar-a-Lago របស់អតីតប្រធានាធិបតីអាមេរិក លោក ដូណាល់ ត្រាំ ក្នុងរដ្ឋ Florida រួមទាំងការចាត់ថ្នាក់មួយចំនួនថាជា “អាថ៌កំបាំងកំពូល” នេះបើយោងតាមឯកសាររបស់តុលាការ ចេញផ្សាយកាលពីថ្ងៃសុក្រ។
លោក ត្រាំ ដែលអាណត្តិប្រធានាធិបតី បានបញ្ចប់ក្នុងខែមករាឆ្នាំ២០២១ កំពុងប្រឈមមុខ នឹងសំណួរអំពីឯកសាររសើប ដែលគាត់បានយកពីសេតវិមាន។ ឯកសាររបស់តុលាការបានបង្ហាញថា ការស្វែងរកដោយការិយាល័យស៊ើបអង្កេត សហព័ន្ធត្រូវបានផ្សារភ្ជាប់ ទៅនឹងការចោទប្រកាន់រួម ទាំងការរំលោភលើច្បាប់ចារកម្ម។
កាលពីថ្ងៃច័ន្ទ លោក ដូណាល់ ត្រឈ បានលើកឡើងថា ផ្ទះរបស់លោកត្រូវបានវាយឆ្មក់ ដោយភ្នាក់ងារ FBI ដោយបានរិះគន់ថាវា “មិនចាំបាច់ ឬមិនសមរម្យ” នេះបើយោងតាមការចុះផ្សាយ របស់ទីភ្នាក់ងារសារព័ត៌មានក្យូដូជប៉ុន។
កាសែត Washington Post បានរាយការណ៍ កាលពីថ្ងៃព្រហស្បតិ៍ថា ឯកសារចាត់ថ្នាក់ទាក់ទង នឹងអាវុធនុយក្លេអ៊ែរ គឺស្ថិតក្នុងចំណោមវត្ថុ ដែល FBI ស្វែងរកក្នុងការស្វែងរកលំនៅដ្ឋាន របស់លោក ត្រាំ នៅ Palm Beach ។
ដីកាឆែកឆេរ ដែលមិនបានបិទនោះ មិនមានព័ត៌មានលម្អិតទាក់ទង នឹងឯកសារដែលភ្នាក់ងារ ប្រមូលបាននោះទេ ប៉ុន្តែបានបង្ហាញថា វត្ថុប្រហែល ២០ប្រអប់សៀវភៅចងក្រងរូបថត និងសៀវភៅសរសេរដៃមួយ ត្រូវបានរឹបអូស។
ឯកសារចាត់ថ្នាក់មួយក្នុងចំណោម ១១ សំណុំត្រូវបានពិពណ៌នាថាជា “ឯកសារដែលបានចាត់ថ្នាក់ /TS/SCI ផ្សេងៗគ្នា” ដែលត្រូវបានគេរាយការណ៍ថា ជាអក្សរកាត់ដែលសំដៅ ទៅលើព័ត៌មានសម្ងាត់កំពូល ឬព័ត៌មានដែលមានលក្ខណៈរសើប៕ ប្រែសម្រួល ឈូក បូរ៉ា
