តេអេរ៉ង់ ៖ ប្រធានសភាអ៊ីរ៉ង់លោក Mohammad Baqer Qalibaf បានឲ្យដឹងថា ការពង្រីក ទំនាក់ទំនងសេដ្ឋកិច្ច និងពាណិជ្ជកម្ម របស់អ៊ីរ៉ង់ជាមួយបេឡារុស្ស អាចជួយកាត់បន្ថយផល ប៉ះពាល់នៃទណ្ឌកម្ម ដែលដាក់ដោយ សហរដ្ឋអាមេរិក និងលោកខាងលិចលើប្រទេសទាំងពីរ។
ទីភ្នាក់ងារព័ត៌មានផ្លូវការ របស់អ៊ីរ៉ង់ IRNA បានរាយការណ៍ថា លោក Qalibaf បានធ្វើការកត់សម្គាល់ នៅក្នុងជំនួបជាមួយរដ្ឋមន្ត្រី ការបរទេស បេឡារុស្ស ដែលកំពុងបំពេញ ទស្សនកិច្ចលោក Vladimir Makei នៅរដ្ឋធានីតេអេរ៉ង់ ។
លោកក៏បានជំរុញ ឱ្យមានការរួបរួម នៃប្រទេសទាំងអស់ នៅក្រោមការដាក់ទណ្ឌកម្មដ៏ឃោរឃៅ របស់បស្ចិមប្រទេស ដែលដឹកនាំដោយសហរដ្ឋអាមេរិក នេះបើយោងតាមការចុះផ្សាយរបស់ទីភ្នាក់ងារ សារព័ត៌មានចិនស៊ិនហួ ។
លោក Qalibaf បានកត់សម្គាល់ថា បន្ទាប់ពីសង្រ្គាមសេដ្ឋកិច្ច ដែលត្រូវបានធ្វើដោយលោកខាងលិច រដ្ឋជាសមាជិកសហភាពសេដ្ឋកិច្ចអឺរ៉ាស៊ី ត្រូវបានគេតម្រូវឱ្យពង្រីកកិច្ច សហប្រតិបត្តិការក្នុងចំណោមពួកគេ ហើយដល់ទីបញ្ចប់នេះ ជំហានជាក់ស្តែង គឺចាំបាច់ ហើយការិយាធិបតេយ្យដ៏លំបាក និងការងារឯកសារគួរតែត្រូវបានលុបចោល ។
លោកបានបន្ដថា “យើងកំពុងមើលឃើញអាកប្បកិរិយាស្តង់ដារ ទ្វេរដងរបស់បស្ចិមប្រទេស នៅពេលដែលពួកភេរវករ កំពុងប្រព្រឹត្តអំពើភេរវកម្ម នៅមជ្ឈិមបូព៌ា ។ រឿងនេះកើតឡើងនៅពេលដែលលោកខាងលិច និងសហរដ្ឋអាមេរិក ជាអ្នកបង្កើតរដ្ឋអ៊ីស្លាមនៅក្នុងតំបន់”។ “ការវាយប្រហារភេរវកម្ម” លើទីសក្ការបូជាដ៏ពិសិដ្ឋមួយនៅភាគខាងត្បូងប្រទេសអ៊ីរ៉ង់ កាលពីថ្ងៃពុធ ដែលបានសម្លាប់មនុស្ស ១៥នាក់និង ១៩នាក់រងរបួស។
សម្រាប់ផ្នែករបស់លោកវិញ រដ្ឋមន្ត្រីបេឡារុស្ស បានថ្កោលទោសការវាយប្រហារ ដោយអំពាវនាវឱ្យដាក់ទណ្ឌកម្មអ្នក ដែលនៅពីក្រោយការវាយប្រហារនេះ ។ លោក Makei បានកត់សម្គាល់ថា បេឡារុស្ស ដែលប្រកាន់យកគោលនយោបាយ ឯករាជ្យក្នុងស្រុក និងបរទេស គឺប្រឆាំងនឹងការដាក់ទណ្ឌកម្ម និងសម្ពាធខុសច្បាប់ លើប្រទេសណាមួយ ៕
