ឡុងដ៏ ៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី២៥ ខែវិច្ឆិកា ឆ្នាំ២០២២ថា កាលពីថ្ងៃព្រហស្បតិ៍រដ្ឋាភិបាលអង់គ្លេស បានប្រាប់ដល់ក្រសួង របស់ខ្លួនឱ្យបញ្ឈប់ការដំឡើង កាមេរ៉ាឃ្លាំមើល ដែលភ្ជាប់ជាមួយចិន នៅតាមអគារ ដែលងាយរងគ្រោះ ដោយលើកឡើង ពីហានិភ័យសន្តិសុខ ។
ការសម្រេចចិត្តនេះធ្វើឡើង បន្ទាប់ពីការពិនិត្យឡើងវិញនៃ “ហានិភ័យសុវត្ថិភាព ដែលអាចកើតមាន នាពេលបច្ចុប្បន្ន និងនាពេលអនាគត ដែលទាក់ទងនឹង ការដំឡើង ប្រព័ន្ធឃ្លាំមើលដោយមើលឃើញ នៅលើអចលនទ្រព្យ របស់រដ្ឋាភិបាល” លោក Oliver Dowden រដ្ឋមន្ត្រីការិយាល័យ ខុទ្ទកាល័យ បានថ្លែងនៅក្នុងសេចក្តីថ្លែងការណ៍ជាលាយលក្ខណ៍ អក្សរទៅកាន់សភាយ៉ាងដូច្នេះ ។
លោក Dowden បានថ្លែងថា “ការពិនិត្យឡើងវិញបានសន្និដ្ឋានថា ដោយសារការគំរាមកំហែងដល់ចក្រភពអង់គ្លេស និងការបង្កើនសមត្ថភាព និងការតភ្ជាប់នៃប្រព័ន្ធទាំងនេះ ការត្រួតពិនិត្យបន្ថែមត្រូវ បានទាមទារឲ្យរិតត្បិត” ។
ការណែនាំរបស់ចក្រភពអង់គ្លេស ក្នុងការអនុវត្ត ចំពោះកាមេរ៉ាដែលផលិតដោយក្រុមហ៊ុន ដែលស្ថិតនៅក្រោមច្បាប់ សន្តិសុខរបស់ចិន និងរួមបញ្ចូលការណែនាំសម្រាប់ក្រសួង ដើម្បីផ្តាច់ឧបករណ៍ទាំងនេះ ពីបណ្តាញកុំព្យូទ័រស្នូល និងពិចារណាដក វាចេញទាំងអស់ ។
ករណីនេះបានកើតឡើង ប៉ុន្មានខែ បន្ទាប់ពីសមាជិកសភា រាប់សិបនាក់បានអំពាវនាវ ឱ្យហាមឃាត់ការលក់ និងប្រើប្រាស់កាមេរ៉ាសុវត្ថិភាព ដែលផលិតដោយក្រុមហ៊ុន Hikvision និង Dahua ដែលជាក្រុមហ៊ុនគ្រប់គ្រង ដោយរដ្ឋ២ផ្នែករបស់ចិន ជុំវិញការភ័យខ្លាចឯកជនភាព និងការព្រួយបារម្ភ នៃផលិតផលរបស់ក្រុមហ៊ុន ដែលត្រូវបានផ្សារភ្ជាប់ទៅ នឹងការរំលោភសិទ្ធិមនុស្សនៅក្នុងចិន ៕
